ژ بەر جانژدەستدانا ژینا ئەمینی، خوەپێشاندانێن بەرفرەھ ل تەھرانێ برێڤە چوون و خەتا ئینتەرنەتێ ژی ل بەشەکا مەزنا ئیرانێ ھات سینۆردارکرن.
پشتی کو ژینا ئەمینی، کەچا کوردا خەلکێ باژارێ سەقزێ یێ رۆژھلاتێ کوردستانێ، ژ ئالیێ پۆلیسێ تەھرانێ ب ھنجەتا پابەندنەبوونا ب حیجابێ، ھاتیە ئێشکەنجەکرن و دوھ 16ێ ئیلۆنا 2022 ل نەخوەشخانەیێ جانێ خوە ژ دەست دا، ئەڤ بوویەر راستی نەرازیبوونەکا مەزن ھات.
ل گۆر چەند ڤیدیۆیێن کو ل مەدیایا جڤاکی بەلاڤ بوونە، ل تەھرانێ ھەتا دەرەنگێن شەڤا بۆری، خوەپێشاندانێن بەرفرەھ برێڤە چوونە و خەلک نەرازیبوونا خوە ل ھەمبەر رەفتارا ھێزێن ئیرانێ و سینۆردارکرنا ئازادیان نیشان دانە و ئەڤ کریارا پۆلیسان ھاتیە شەرمەزارکرن.
خوەپێشاندەران درووشمێن جودا ل دژی کۆمارا ئیسلامییا ئیرانێ گۆتنە و چالاکڤانان ژی راگھاند، خەتا ئینتەرنەتێ ل تەھرانێ و بەشەکە ئیرانێ ھاتیە سینۆردارکرن، دا کو رێ ل بەر زێدەبوونا ئالۆزی و خوەپێشاندانان بگرن.
خالێ ژینا ئەمینی دیار کر، ئیرۆ تەرمێ ژینا دگھیژە باژارێ سەقزێ و ل ور تێ بخاکسپارتن، تێ چاڤەرێکرن کو ئیرۆ ل رۆژھلاتێ کوردستانێ خوەپێشاندانێن بەرفرەھ ژ بۆ نیشاندانا نەرازیبوونا ل ھەمبەر ئێشکەنجەکرنا ژینا بهێن لدارخستن.
