بەشەک ژ چالاکڤانێن سیاسی و سڤیلێن رۆژھلاتێ کوردستانێ د داخویانیەکێ دا داخوازا گرەڤا گشتی ژ خەلکێ ئیرانێ کرن. د بەشەکا داخویانیێ دا ھات دیارکرن: “ژینا ئەمینی یەکەم قوربانیا سیاسەتێن کۆمارا ئیسلامی یا ئیرانێ یێن ل دژی ژن و مرۆڤان نینە و یا داوی ژی نابە.”
د داخویانیێ دا ھاتیە دەستنیشانکرن: “ئاساییشا جادەیێن باژارێن مە ژ بۆ ژنان گونجاو نینە و سەدەما سەرەکی یا تونەبوونا ئاساییشێ ژی ھێزێن ئیرشادێ نە.” (ئیرشاد، ھێزەکا تایبەتە ژ بۆ سەپاندنا حیجابێ.”
چالاکڤان دبێژن: “کۆمارا ئیسلامی یا ئیرانێ ئالایا دەستھلاتداریا خوە ل سەر تەرمێ ب سەدان و ب ھەزاران ژنێن قوربانیێن توندووتووژیا حکوومەت و جڤاکێ ھلدایە.”
چالاکڤانێن سیاسی و سڤیلێن رۆژھلاتێ کوردستانێ ئاماژە ب “بێتاقەتبوونا ئایدۆلۆژیا حکوومەتێ ل ھەمبەر ژنێن ئیرانێ” دایە و ژ خەلکێ ئیرانێ داخواز کریە “ڤێ بێدەنگیێ بشکینین”.
پشتی کو ژینا ئەمینی، کەچا کوردا خەلکێ باژارێ سەقزێ یێ رۆژھلاتێ کوردستانێ، ژ ئالیێ پۆلیسێ تەھرانێ ب ھنجەتا پابەندنەبوونا ب حیجابێ، ھاتیە ئێشکەنجەکرن و دوھ 16ێ ئیلۆنا 2022یێ ل نەخوەشخانەیێ جانێ خوە ژ دەست دا، ئەڤ بوویەر راستی نەرازیبوونەکە مەزن ھات.
