تەڤگەرا ژنان یا پەکەکێ PAJK ێ دو رۆژان بەرێ داخویانیەک دا و دیار کر کو یەک ژ رێڤەبەرێن وێ یا ب ناڤێ «ئەسما ئارات» یا ب ناڤێ کۆد «دەلال نوورھاک» ژیانا خوە ژ دەست دایە.
د داخویانییا کو تێ دا دەربارێ ژیانا وێ دا ئاگاھی نەھاتییە دایین دا، ھەر وھا پڕ بالکێشە کو ئاگاھیێن دەربارێ ژییانا «ئەسما ئارات» و جھێن کو لێ دخەبتی نەھاتنە دایین. د داخویانیا PAJKێ دا ھات راگھاندن کو «ئەسما ئارات» 3 سالان بەرێ ژیانا خوە ژ دەست دایە.
دەولەتا ترک 3 سالان بەرێ ئەڤ بوویەرە وەک کوشتنا «بەسێ ئەرزنجان» راگهاند بوو
داخویانیا PAJKێ ب پرانی وەکە بیرانینێ ھاتبە دایین ژی، جارا یەکەمە کو ژییان ژ دەست دانا «ئەسما ئارات» تێ راگھاندن. دەولەتا ترک د مەھا یەکەم یا سالا 2020ێ دا راگھاندبوو کو «ئەسما ئارات» د مەھا ئیلۆنێ دا ھاتیە کوشتن.
چاڤکانیێن «دارکا مازی» دیار کرن کو دەولەتا ترک گۆتیە «بەسێ ئەرزنجان» (ئایفەر کۆردو) د سالا 2019ێ دا ھاتیە کوشتن و کەسا کو ھاتیە ئارمانجکرن ئەسما ئاراتە.
چما پشتی سێ سالان؟
وەفاتا «ئەسما ئارات» ژ ئالیێ دەولەتا ترک ڤە دھات زانین و ڤێ یەکێ د مەدیایێ دا ژی جھ گرت بوو، لێ ئەڤ خالەکە بالکێشە کو ھەتا نھا پەکەکێ مرنا وێ ئاشکەرا نەکرییە.
ھندەک ئەندامێن مالباتا «دەلال نوورھاک» عاجزی نیشان دان و گۆتن، “چما تشتێن کو دەولەتا ترک دزانە، ژ مە ڤەدشێرن.” تەڤی داخویانیێن دەولەتا ترک ژی پەکەکە ونداھیێن خوەیێن سالێن داوی ڤەدشێرە. تەنێ د ھندەک ھەیامان دا ناڤێن رێڤەبران یەک-یەک ئاشکەرا دکە. لێ جیھ و شێوازێ بوویەرێ راست ناھێ دایین.
کەسێن نێزی پەکەکێ کو مە ژ بۆ ئاشکەراکرنا ناڤێ «ئەسما ئارات» سەری ل وان دا، دیار کرن کو دەما ئاشکەراکرنا ناڤێ «ئەسما ئارات» گرینگە. چاڤکانیێن مە دیار دکن کو پەکەکە وەکە بەرێ د ناڤا گرسەیێن «مەرەش، پازارجک و ئەلبیستانێ» دا ب باندۆر نینە. ب تایبەتی ژی د ناڤا پەکەکێ دا گەلەک کێم کادرۆیێن بەرێ یێن مەرەشێ مانە و ناڤێ ئەسما ئارات دێ ب ھەستیاری ل سەر گرسەیا کەڤنا مەرەشییان باندۆرەک ئەرێنی چێبکە لۆما ژی پەکەکە دخوازە ڤێ بکە بابەتەکی پرۆپاگاندایێ.
چاڤکانیێن مە ژی گۆتن، “گرسەیا پەکەکێ یا ل ئەورۆپایێ ھاڤینێ د بێهنڤەدانێ دا نە، پاییز و زڤستانێ ڤەدگەرن مالێن خوە. پەکەکە دێ نھا ژ بۆ ئەسما ئارات ل وەلاتێن ئەورۆپایێ یێن کو گەلێ مەرەشێ لێ دژین، بیرانینان ئۆرگانیزە بکە و گرسە مەجبورە کو تەڤلی ببە. ھەر وھا مەھێن پاییزێ مەھێن کامپانیایێن پەکەکێ یێن سالانە نە. د ڤان کامپانیان دا ب ملیۆنان پارە ژ مرۆڤان دستینن. مرۆڤێن مەرەشێ ب گشتی بەرێ ل ئەورۆپا ب جھ بوونە، ب گشتی دەولەمەندن. پەکەکە ھەر سال کەشەکێ ھەستییار چێدکە ژ بۆ کو ژ وان پارەیان زێدە بستینە. چەند سالن قاسم ئەنگین «ئیسمال نازلیکول» کو یەک ژ کادرۆیێن بەرێ یێن پەکەکێ یێن مەرەشێیە، د 27ێ گولانا 2020ێ دا ژییانا خوە ژ دەست دابوو. ئیسال ژی دێ د ناڤا کامپانیایێن پارە کۆمکرنێ دا ناڤێ «دەلال نوورھاک» هێتە بکارئانین.”
دەلال نوورھاک (ئەسما ئارات) کییە؟
ئەسما ئارات یا د سالا 1986ێ دا ل ئەورۆپایێ تەڤلی پەکەکێ بووی، د سالا 1988ێ دا وەکە خەباتکار هاتە شاندن بوو مەرەشێ. دەلال کو دەمەکێ د گرتیگەھێ دا دمینە، پشترا بەرێ خوە ددە چیایێ ئەیالەتا ئامەدێ. ل ھەرێمێن وەکی قەندیل، خنێرە، ئەرمەنستان، مەخموور کار دکە. د گرتیگەھێن ئیران و ترکیایێ دا ژی مایە.
دەلال «ئەسما ئارات» دەمەکێ د کۆمیتەیا مالی یا کەجەکێ دا ژی جھ گرت ل مەخموور و ھەولێرێ خەباتێن ئابۆری مەشاندن. ژ بۆ پەکەکێ ل ور خوارنگەھ و فرۆشگەھان ڤەدکە. ل کامپا مەخموورێ ژی خەباتێن ب ڤی رەنگی دمەشینە. پشترا ل سەر ناڤێ PAJKێ ل رۆژئاڤا د مەجلیسێن ژنان دا کار دکە.
ئەسما ئارات د ناڤا پەکەکێ دا بەرپسیارییێن بلند نە وەرگرتنە. سالەک بەریا کو ژییانا خوە ژ دەست بدە، ژ رۆژئاڤا ھات قەندیلێ و د ناڤا KJB دا جھ گرتبوو.
د ئیلۆنا 2019ێ دا تەڤی گەریلایا پەکەکێ یا ب ناڤێ «زیلان قامشلۆ» یا کو د یەکینەیا “ئەولەھیا رێڤەبەریێ” یا KJB دا جیھ دگرت، د ئێریشەکا ھەوایی یا دەوەلتا ترک دا ژیانا خوە ژ دەست دابوو.
