د خوەپێشاندانا سەقزێ دا کوشتی و بریندار ھەنە
خەلکێ باژارێ سەقزێ یێ رۆژھلاتێ کوردستانێ پشتی مەراسیما جەنازەیێ ژینا ئەمینی، بەر ب قەیمەقامیا باژێر ڤە ب رێ کەتن و کوشتنا ژینا ئەمینی شەرمەزار کرن، لێ بەلێ ھێزێن ئەولەھیێ تەقە ل خەلکێ کر و ل گۆر زانیاریان، کوشتی و بریندار ھەنە.
ئیرۆ شەمیێ 17ێ ئیلۆنێ، تەرمێ ژینا ئەمینی گھیشتە باژارێ سەقزێ یێ رۆژھلاتێ کوردستانێ و ل گۆرستانا «ئایچی» ب خاکێ ھات سپارتن.
د وێنە و ڤیدیۆیێن کو چالاکڤانان د سۆسیال مەدیایێ دە پارڤە کرنە دە دیار دبە کو ب ھەزاران خەلک د مەراسیما جەنازەیێ ژینا ئەمینی دا بەشدار بوونە و پشتی ڤەشارتنا جەنازەیێ وێ، چەندین درووشمێن وەکە “نەمان بۆ دیکتاتۆر” ژ ئالیێ خەلکێ ڤە ھاتن گۆتن.
خەلک پشترا چوون بەر ئاڤاھیا قەیمەقامیا سەقزێ و داخوازا ئەشکەرەکرنا ھوورگلیێن وێ تاوانێ و جەزاکرنا ئەنجامدەرێن وێ تاوانێ کرن، لێ بەلێ ھێزێن ئەولەھیێ ب مەبەستا بەلاڤکرنا خەلکێ، گولـلە بەردان و ژ بەر ڤێ کوشتی و بریندار ھەنە، لێ ھین زانیاریێن ب ھوورگلی دەربارێ ھەژمارا قوربانیان دە تونە نە.
ژینا ئەمینی، کەچا کوردا 22 سالی کو رۆژا 13ێ ئیلۆنێ ل تەھرانێ ب ھنجەتا کو پابەندی حیجابێ نەبوویە، ژ ئالیێ ھێزێن ئیرانێ ڤە ھاتبوو دەستەسەرکرن و پشترا ژ بەر کو ئێشکەنجە لێ ھاتبوو کرن، بۆ نەخوەشخانەیێ ھاتبوو ڤەگوھەستن و پشتی 3 رۆژان ل نەخوەشخانەیێ جانێ خوە ژ دەست دابوو.
