دەزگەها هەوالگیریا ترکیێ (میتێ) کوشتنا 5 چەکدارێن یه‌په‌گێ و په‌كه‌كێ ل رۆژئاڤایێ کوردستانێ راگهاند، یێك ژێ به‌رپرسه‌كێ په‌كه‌كێ یه ب ناڤێ «مەهمەت گوربوز».
ئاژانسا ئه‌نادۆلێ یا ده‌وله‌تا ترکیێ ئیرۆ رۆژا یه‌كشه‌می 18\9\2022ێ بەلاڤ کر، میتێ 2 ئۆپەراسیۆنێن تایبەت یێن ب درۆنان ل دژی چەکدارێن یه‌په‌گێ و په‌كه‌كێ ل عەین عیسایێ پێک ئانینە و د ئەنجامێ دە 5 چەکدارێن یه‌په‌گێ و په‌كه‌كێ هاتنە کوشتن.
هات راگهاندن کو ئەو ئۆپەراسیۆن رۆژا 16ێ ئیلۆنێ هاتنە کرن و د ناڤا کوشتیان دە بەرپرسێ په‌كه‌كێ ل هەرێما فراتێ مەهمەد گوربوز ب كۆدناڤێ «رۆژهات کاراکۆچان» هەیە.
ئەڤ یەک د دەمەکێ دە یە، پشتی گەفا ترکیێ یا دەستپێکرنا ئۆپەراسیۆنەکە لەشکەری ل رۆژئاڤایێ کوردستانێ و باکورێ سووریێ، ئێریشێن ئارتێشا ترکیێ یێن ب رێیا درۆنان ل سەر رۆژئاڤایێ کوردستانێ و دەڤەرێن د دەستێ هه‌سه‌دێ دە زێدە بوونە.
ژ ئالیەکی دن ڤە، وەزیرێ ناڤخوەیێ ترکیێ سولەیمان سۆیلو ل تویتەرا خوە بەلاڤ کر، ل گەڤەرێ د شەرێ ب گەریلایێن په‌كه‌كێ رە، 2 چەکدارێن په‌كه‌كێ هاتنه کوشتن و چەکدارەکی دنێ په‌كه‌كێ هاتیە دەستەسەرکرن.
په‌كه‌كێ ژی راگهاند، د ناڤا دو رۆژێن بۆری، وان 25 جاران ئێریشی هێزێن ترکیێ کرنە و هەری کێم 19 لەشکەرێن ترک هاتنە کوشتن.
