ل دیاربەکرێ پانەلا ب ناڤێ “ژ دۆھی ھەتا ئیرۆ کورد” ھاتە ل دارخستن. د پانەلێ دا نڤیسکار ئیسمایل بەشیکچی و فوئاد ئۆنەن بەشدار بوون. ئاخافتنڤانان ئاماژە کرن کو دڤێ کورد ژ دیرۆکا خوە سوودێ وەربگرن و ئەنەرژیا خوە ژ بۆ بدەستخستنا مافێن خوەیێن نەتەوەیی خەرج بکن.
ژ ئالیێ جوانێن نەتەوەیی یێن کوردستانێ ڤە ل دیاربەکرێ پانەلەک ب ناڤێ ژ دۆھی ھەتا ئیرۆ کورد ھات ل دارخستن. د پانەلێ مافناس «مورسەل ئەکیجی» وەک مۆدەراتۆر جھ گرت و ئاخافتنڤانێن پانەلێ ژی نڤیسکار و جڤاکناس ئیسمایل بەشیکچی و نڤیسکار و سیاسەتمەدار فوئاد ئۆنەن بوون. ئاخافتڤانان دەربارێ خالێن گرینگێن دیرۆکا کوردان دا ئاماژە کرن کو دڤێ کورد دیرۆکا خوە باش بزانبن و دڤێ کورد ل سەر بنگەھا داخوازا سەرخوەبونێ سیاسەتێ بکن.
سیاسەتمەدار و نڤیسکار فواد ئۆنەن ژ بۆ K24 گۆت: “دو شێوازێن سیاسەتا کوردان ھەیە؛ یەک ژێ دخوازە پرسا کورد ناڤا سینۆرێن دەولەتێن داگیرکەر دا بهێتە چارەسەرکرن و داخوازا فەدەراسیۆن و ئۆتۆنۆمیێ تێ کرن، یا دن ژی کو ئەم وێ دپارێزن ئەوە کو داخوازا سەرخوەبونا کوردستانێیە.”
د پانەلێ دا بەحسا رەوشا ئیرۆ یا کوردان ژی ھات کرن و بانگ ھاتە کرن کو دڤێ کورد ئەنەرژیا خوە ب پڕانی ژ بۆ بدەستخستنا مافێن خوەیێن نەتەوەیی خەرج بکن و دڤێ کورد گرانیێ بدن خەباتێن نەتەوەیی.
نڤیسکار و جڤاکناس ئیسمایل بەشیکچی ژ بۆ K24 گۆت: “کوردان ب تەکۆشینا خوە چەند قەدەغەیێن سەر کورد و کوردستانێ دان راکرن و ژ سالێن 90ێ پێ دا خەباتێن باش ھاتن کرن. د ڤێ چارچۆڤەیێ دا پانەلێن وسا ژی باشن کو دڤێ جڤاک و نفشێن نو دیرۆکا خوە باش بزانبن.”
بەشا داویێ یا پانەلێ بۆ پرس و بەرسڤان دەم ھاتە ڤەقەتاندن و د پرس و بەرسڤان دا د ھشمەندیا نەتەوەیی دا گرینگیا زمان ھات نرخاندن و بانگا خوەدیلێدەرکەتنا زمانێ کوردی ھات کرن.
د پانەلێ دا بال ھاتە کێشان کو سەرژمێریا کوردان ژ سەرژمێریا 23 وەلاتێن یەکیتیا ئەورۆپایێ زێدەترە ھات خوەستن کو د ناڤا جڤاکا کوردان دا ھشمەندیا نەتەوەیی بلند ببە.
