دادگەھا دەهەمینا سزایێ گران یا دیاربەکرێ دەربارێ بوویەرا کوشتنا تاھیر ئەلچی دا بریارا گوھداریکرنا ئەحمەد داودئۆغلو بەتال کر.
سەرۆکێ بارۆیا دیاربەکرێ ناھید ئەرەن، ل سەر حەسابا خوە یا تۆرا جڤاکی تویتەرێ راگھاند کو دادگەھا دەهەمینا سزایێ گران یا دیاربەکرێ، بێیی ئاگاھدارکرنا پارێزەرێن دۆزا تاھیر ئەلچی، بریارا گوھداریکرنا سەرۆکوەزیرێ وێ دەمێ ئەحمەد داودئۆغلو بەتال کر. ناھید ئەرەن گۆت؛ ئەڤ بریار ل دژی ئوسوولێ یە و نە حقووقییە.
سەرۆکێ بارۆیا دیاربەکرێ تاھیر ئەلچی د 28ێ مژدارا 2015ێ دا د دەما کۆنگرەیەکا رۆژنامەگەری دا ل بەر منارەیا چارلنگ ھاتبوو کوشتن. دادگەھا دەهەمین سزایێ گران یا دیاربەکرێ، ل سەر داخوازا پارێزەرێن ئەلچی بریار دابوو کو سەرۆکوەزیرێ وێ دەمێ ئەحمەد داودئۆغلو ژی د دادگەھێ دا وەکی شاھدحال بێ گوھدارکرن.
سەرۆکێ بارۆیێ ناھید ئەرەن گۆت؛ ل سەر داخوازا سەردۆزگەریا کۆمارێ، دادگەھا دەهەمینە سزایێ گران ژ بەریا رۆژا دانشینێ و بێیی ئاگاھدارکرنا پارێزەران بریارا ئاگاھدارکرنا ئەحمەد داودئۆغلو بەتال کر. ل گۆری راگھاندنا ناھید ئەرەن، دادگەھێ راگھاندیە کو دێ گوھداریکرنا ئەحمەد داودئۆغلو ژ بۆ دۆزا تاھر ئەلچی چ سوود نابیت و لەوما ئەو بریار بەتال کریە.
ل گۆری رایەدارێن بارۆیا دیاربەکر و پارێزەرێن تاھر ئەلچی، ئەڤ بریارا دادگەھێ نیشان ددە کو ئارمانجەکا دن ھەیە و نایێ خواستن کو ئەڤ بوویەرە بهێتە زەلالکرن.
ئەحمەد داودئۆغلو د سەردانەکا خوەیا دیاربەکرێ دا گۆتبوو؛ کوشتنا تاھر ئەلچی کوشتنەکا سیاسییە.
سەرۆکێ بارۆیا دیاربەکرێ بانگ ل ئەحمەد داودئۆغلو دکە کو دەربارێ کوشتنا تاھر ئەلچی دا تشتێن کو دزانیت ژ بۆ رایا گشتی دیار بکەت.
