رێخستنا هيومان رايتس ووچ داخواز ژ کۆمارا ئیسلامی یا ئیرانێ دکە، لێکۆلینەکە زەلال دەربارێ ژیان ژ دەست دانا مەهسا «ژینا» ئەمینی دە بکە.
هيومان رايتس ووچ د داخویانیەکێ دە گۆت کو «مرنا وێ کەچێ پشتی گرتنا وێ ژ بەر ئاوایێ جلوبەرگێن وێ ڤە، دەلیلەک ل سەر هلوەشینەکە خراپە».
هەر وها گۆت: «پێویستە لێکۆلینەک زەلال بێتە کرن و کەسێن د بەر مرنا مههسا دە بەرپرسن بێن گرتن و مالباتا وێ وەرە قەرەبووکرن».
د داخویانیێ دە هات گۆتن، «دڤێ دەستهلاتدارێن ئیرانێ دەملدەست یاسایا سەپاندنا حیجابێ یا ب نەچاری هلوەشینە و یاسایێن دن یێن کو ژنێ ژ سەرخوەبوونێ و مافێن وێ بێپار دکن ژی هلوەشینن یان سەرەراست بکن». تەکەز کر ژی، «تەنێ وێ دەمێ دێ پێشکەتنەک ژ بۆ ژناڤبرنا جوداکاری، توندوتویژی و مرنا کو نیڤا جڤاکا ئیرانێ ژ بەر دەولەتەکە زۆردار دنالە، چێببە».
مەهسا «ژینا» ئەمینی کەچەکە کورد یا 22 سالی بوو، رۆژا 13ێ ئیلۆنا 2022ان ب برایێ خوە رە ژ باژارێ سەقزێ سەردانا تەهرانێ کربوو و ژ بەر کو حیجابا خوە ب ئاوایەکی رێکوپێک گرێ نەدایە ژ ئالیێ پۆلیسان ڤە هاتە بنچاڤکرن و پشتی دو دەمژمێران ژ بۆ نەخوەشخانەیێ هات برن و رۆژا 16ێ مەهێ ل نەخوەشخانەیێ ژیانا خوە ژ دەست دا.
مالباتا ژینا و چالاکڤانێن رۆژهلاتێ کوردستانێ دبێژن، ژینا د بن ئەشکەنجەیێ دە هاتیە کوشتن، لێ پۆلیس ژی دبێژە، ژینا ژ بەر جەلتەیا دل ژیانا خوە ژ دەست دایە.
کوشتنا ژینا ئەمینی گەلەک کارڤەدانێن بەرفرەهـ یێن ل سەر ئاستا ناڤخوە و ناڤدەولەتی ل پشتی خوە ئانین و خوەپێشاندان ل باژارێ سەقزی و چەند باژارێن دن یێن رۆژهلاتا کوردستانێ دەرکەتن.
د خوەپێشاندانێن رۆژا دوشەمێ 19ێ ئیلۆنێ یێن ل باژارێن رۆژهلاتێ کوردستانێ دە 4 کەس هاتن کوشتن و ب سەدان کەس بریندار بوون، هەر وها زێدەتری 250 کەس ژی هاتن دەستەسەر کرن.