ل رۆژهلاتێ کوردستانێ 3 وەلاتیێن دن یێن کورد هاتن کوشتن

ل رۆژهلاتێ کوردستانێ 3 وەلاتیێن دن یێن کورد هاتن کوشتن

ل باژارێن ئورمیە، مەهاباد و پیرانشار یێن رۆژهلاتێ کوردستانێ 3 کەسێن دن ب تەقەیێن راستەراست یێن هێزێن چەکدارێن ئیرانێ هاتن کوشتن و پارێزگارێ سنەیێ ژی کوشتنا 3 وەلاتیێن کورد پشتراست کر.

ئێڤارا 20ێ ئیلۆنا 2022ێ، ژنەکە 65 سالی یا ب ناڤێ هاجەر عەباسی کو رۆژا دوشەمبێ ب تەقەیا راستەراست یا هێزێن چەکدارێن ئیرانێ بریندار ببوو، ژ بەر گرانیا برینێن خوە، جانێ خوە ژ دەست دا.

ل باژارێ ئورمیێ تەقە ل خوەپێشاندەران هات کرن و د ئەنجامێ دە خۆرتەکی 23 سالی یێ ب ناڤێ فەرهاد دەروێشی، ژ بەر کو گوللـە ل سەرێ وی کەت، جانێ خوە ژ دەست دا.

ل باژارێ پیرانشار ژی، جوانەکی 16 سالی یێ ب ناڤێ زەکەریا خەیال، پشتی برینداربوونا ب تەقەیا راستەراست یا هێزێن چەکدار، جانێ خوە ژ دەست دا.

پارێزگارێ سنەیێ ئیسماعیل زاری کووشا، کوشتنا 3 خوەپێشنادەران پشتراست کر، لێ بەلێ گۆت کو ئەو کەس ب چەکەکی هاتنە کوشتن کو د دەستێ هێزێن ئەولەهیا ئیرانێ دە نینە.

مەدیایا ئیرانێ ژی راگهاندیە، ل باژارێ کرمان یا ل ناڤەندا ئیرانێ، ژنەک ب تەقەیا راستەراست یا هێزێن چەکدارێن ئیرانێ هات کوشتن.

مەهسا «ژینا ئەمینی» کەچەکە کورد یا 22 سالی بوو، رۆژا 13ێ ئیلۆنا 2022ێ ب برایێ خوە رە ژ باژارێ سەقزێ سەردانا تەهرانێ کربوو و ژ بەر کو حیجابا خوە ب ئاوایەکی رێکوپێک گرێ نەدایە ژ ئالیێ پۆلیسان ڤە هاتە بنچاڤکرن و پشتی دو دەمژمێران ژ بۆ نەخوەشخانەیێ هات برن و رۆژا 16ێ مەهێ ل نەخوەشخانەیێ جانێ خوە ژ دەست دا.

مالباتا ژینا و چالاکڤانێن رۆژهلاتێ کوردستانێ دبێژن، ژینا د بن ئەشکەنجەیێ دە هاتیە کوشتن. لێ پۆلیس ژی دبێژە، ژینا ژ بەر جەلتەیا دل جانێ خوە ژ دەست دایە.

کوشتنا ژینا ئەمینی، گەلەک کارڤەدانێن بەرفرەهیێن ل سەر ئاستا ناڤخوە و ناڤدەولەتی ل پشتی خوە ئانین و خوەپێشاندان ل باژارێ سەقزی و چەند باژارێن دن یێن رۆژهلاتا کوردستانێ دەرکەتن.

د خوەپێشاندانێن رۆژا دوشەمبێ 19ێ ئیلۆنێ یێن ل باژارێن رۆژهلاتێ کوردستانێ دە 4 کەس هاتن کوشتن و ب سەدان کەس بریندار بوون، هەروه‌ها زێدەتری 250 کەسان ژی هاتن دەستەسەرکرن.

پوستێن ھەمان بەش