سەرۆکوەزیرێ هەرێما کوردستانێ مەسروور بارزانی، پێشوازی ل ئالیکارا وەزیرێ به‌رگریێ یێ ئه‌مەریکایێ بۆ کاروبارێن ئاسایشا ناڤدەولەتی سلێست والێندەر کر.
ئیرۆ چارشەمبێ 21ێ ئیلۆنا 2022ێ، سەرۆکوەزیرێ هەرێما کوردستانێ، پێشوازی ل شاندەکە ئه‌مەریکی یا ب سەرۆکاتیا ئالیکارا وەزیرێ به‌رگریێ یێ ئه‌مەریکایێ بۆ کاروبارێن ئاسایشا ناڤدەولەتی سلێست والێندەر کر و سپاسیا پشتەڤانیا ئه‌مەریکایێ یا ژ بۆ هێزێن پێشمەرگە کر.
ل گۆر داخویانیا ئۆفیسا سەرۆکوەزیر د جڤینێ دە ل سەر پێشڤەبرنا پێوەندیێن هەرێما کوردستانێ و ئه‌مەریکایێ و یاداشتا هەڤتێگهیشتنێ گۆتووبێژ هات کرن، کو ئیرۆ د ناڤبەرا هەردو ئالیان دە ل سەر بەردەوامبوونا پشتگریکرنا پێشمەرگە و هەڤاهەنگیا سەربازی و ئەولەهیێ تێ ئیمزە کرن.
هات ئەشکەرەکرن کو سەرۆکوەزیر مەسروور بارزانی سپاسیا پشتەڤانیا ئه‌مەریکایێ کر ژ بۆ هێزێن پێشمەرگە، ب تایبەتی د رووبرووبوونا تەرۆر و تەرۆریستێن داعشێ دە. ب تایبەتی کو ئیرۆ ئەو یاداشتا هەڤتێگهشتنا گرینگ د ناڤبەرا هەردو ئالیان دە تێ ئیمزە کرن و داخوازا هەرێما کوردستانێ ژی ژ بۆ پێشڤەبرنا پێوەندیێن ل گەل ئه‌مەریکایێ دوپات کریە.
ئالیکارا وەزیرێ به‌رگریێ یێ ئه‌مەریکایێ کێفخوەشیا خوە ب سەردانا هەرێما کوردستانێ نیشان دایە و دیار کریە کو جهێ شانازیێ یە ئیرۆ ل ڤرە ژ بۆ ئیمزە کرنا ڤێ یاداشتا هەڤتێگهیشتنێ کو نیشانەیا بهێزکرنا پێوەندیێن هەرێما کوردستانێ و ئه‌مەریکایێ یە.
د داویا داخویانیێ دە هاتیە، چاکسازیێن کابینەیا نەهەم، ب تایبەتی چاکسازیێن وەزارەتا پێشمەرگە و گرینگیا چارەسەرکرنا کێشەیێن ناڤبەرا هەرێما کوردستانێ و حکوومەتا فەدەرال ب ئاوایەکی بنگەهین و ل سەر بنگەها دەستوورێ، چەند مژارێن دن یێن جڤینێ بوون، کو بالیۆزا ئه‌مەریکایێ یا ل ئیراقێ ئالنا رۆمانووسک و کۆنسولێ گشتی یێ ئه‌مەریکایێ یا ل هەرێما کوردستانێ ئەرڤن هێکس ژی ئامادە بوون.
