ئەنجوومەنا نشتیمانی یا کورد ل سووریێ دەربارێ کوشتنا کەچا کورد یا رۆژهلاتێ کوردستانێ ژینا ئەمینی دە داخویانیەک بەلاڤ کر.
د داخویانیێ دە، ئەمینداریا گشتی یا ئه‌نه‌كه‌سێ دبێژە کو ئەو ب توندی ڤێ «تاوانا کرێت» و «سەرکوتکرنا خوەپێشاندەران» ژ ئالیێ دەستهلاتێن ئیرانێ ڤە شەرمەزار دکن.
ئەمینداریا گشتی یا ئه‌نه‌كه‌سێ هەروها دبێژە کو رەژیما ئیرانێ ب ڤێ کریارێ، «تاوانەکە نوو ل دیرۆکا خوە یا رەش د وارێ مافێن مرۆڤان دە» زێدە کریە.
ئه‌نه‌كه‌سێ داخواز ل نەتەوەیێن یەکبوویی و رێخستنێن ناڤدەولەتی و هقووقی دکە کو ڤان تاوانان شەرمەزار بکن و سینۆرەکی ژ ڤان بنپێکرنێن کرێت یێن ل دژی مافێن مرۆڤان ب گشتی و مافێن ژنان ب تایبەتی دانن.
ژینا ئەمینی یا 22 سالی و خەلکا سەقزێ ئێڤارا رۆژا سێشەمبێ 13ێ ئیلۆنا 2022 ل ستاسیۆنا هەقانی یا مەترۆیا ئیرانێ ژ ئالیێ پۆلیسێ ئەخلاقێ یێن تەهرانێ ڤە ب هنجەتا پابەندنەبوونا ب حیجابا ئیسلامی هاتبوو دەستەسەرکرن و پاشێ بۆ گرتیگەهەکە پۆلیسان ل جادەیا وەزیران یا تەهرانێ هاتبوو شاندن.
رۆژا 16ێ ئیلۆنێ پشتی کو سێ رۆژان ل نەخوەشخانەیا کەسرا یا تەهرانێ مای، و د دەمەکێ دە کو د کۆمایێ دە بوو و مەژیێ وێ راوەستیابوو، ژینا ئەمینی جانێ خوە ژ دەست دا.
