هه‌ر یێك وه‌زاره‌تا به‌رگریێ یا تركیێ و هه‌په‌گێ باسكێ له‌شكه‌ری یێ په‌كه‌كێ ئامارێن په‌ڤچوونێن خوه یێن داویێ به‌لاڤ كرن، ل گۆری په‌كه‌كێ 8 له‌شكه‌ر و ل گۆری تركیێ یێك له‌شكه‌ر هاتیه كوشتن.
هه‌په‌گێ باسكێ له‌شكه‌ری یێ په‌كه‌كێ د داخویانیەکێ دە دبێژە، ل هەرێما زاپێ، خاکوورکێ و ئامێدیێ د چالاکیێن جودا دە گه‌ریلایێن وان 8 له‌شكه‌رێن ترکیێ کوشتنە، هەروها وەزارەتا به‌رگریێ یا ترکیێ ژی راگهاند کو له‌شكه‌ره‌كی وان ل هەرێما ئۆپه‌راسیۆنا پەنچە کلیت ژ ئالیێ په‌كه‌كێ ڤە هاتیە کوشتن.
هپگێ دوهـ 21ێ ئیلۆنێ راگهاندیە کو ژ 18 ئیلۆنێ ڤە د چالاکیێن جودا دە ل هەرێمێن زاپێ، خاکوورکێ و ئامێدیێ کو دکەڤن ناڤ ئاخا هەرێما کوردستانێ دا وان 8 له‌شكه‌رێن تركیێ کوشتنە.
وەزارەتا به‌رگریێ یا ترکیێ ژی ل هه‌مان رۆژێ راگهاند کو ل باشوورێ کوردستانێ د چارچۆڤەیا ئۆپەراسیۆنا ئارتێشا وی وەلاتی یا ب ناڤێ «پەنچە-کلید» دە چاویشەکی پسپۆرێ ب ناڤێ محه‌مه‌د کاراچام هاتیە کوشتن و دو له‌شكه‌رێن وان ژی بریندار بوونە.
ئارتێشا تركیێ و رێخستنا په‌كه‌كێ هه‌ر ل ناڤبه‌را چه‌ند رۆژان ئامارێن شه‌ر به‌لاڤ دكن، هه‌ر یێك دبێژ مه ئه‌وقاس كوشتنه، لێ به‌لێ هه‌ر دو ئالی راست نابێژن و ڤێ وه‌كه شه‌ره‌كی تایبه‌ت ل دژی هه‌ڤ د مه‌شینن و یێ كو زرارا راستین یا شه‌ر دبینه، ته‌نێ گه‌لێ باشوورێ كوردستانێ یه.
