ئیستخباراتا ئیراقێ و رێخستنا په‌كه‌كێ، لهه‌ڤهاتنه‌كه ژێر ب ژێر ده‌ربارێ شه‌نگالێ كرنه و ل رۆژێن پێش مه جڤینه‌ك د نێڤبه‌را هه‌ردو ئالیان و حه‌شدا شه‌عبی ده، وێ وه‌ره ئه‌نجام دایین.
پێگه‌ها «داركا مازی» ژ چاڤكانیێن خوه یێن تایبه‌ت ل شنگالێ هین بوو كو ل رۆژا 22 ته‌باخا ئیسال 2022ێ، عومه‌ر سالح هەڤسەرۆکێ پارتیا ئازادی و دەمۆکراتیکا ئێزدیان «PADÊ» یا گرێدای په‌كه‌كێ، ب عه‌قید موزاحم شه‌مه‌ری برێڤه‌برێ به‌شا رۆژئاڤا نه‌ینه‌وایێ یا ئیستخباراتا ئیراقێ جڤیایه.
د جڤینێ ده، عه‌قید موزاحم ده‌ربارێ ره‌وشا شه‌نگالێ ئاخڤی یه و بریار گرتیه كو ل رۆژێن پێش مه، هێزێن چه‌كدار یێن ل شه‌نگالێ وه‌كه «ئارتێش، حه‌شدا شه‌عبی، پۆلیس و چه‌كدارێن یه‌به‌شێ» ب هه‌ڤره جڤینه‌كه به‌رفه‌ره‌هـ ساز بكن و وێنه و دیمه‌نێن جڤینێ ل مه‌دیایێ پارڤه بكن ژ بۆ كو ژ گه‌ل ره خوه‌یا ببه كو تو گرفت ل نێڤبه‌را ڤان هێزان ده تونه و پێوه‌ندیێن وان ل ئاسته‌كی هه‌ری باشن.
چاڤكانیێن مه ئه‌شكه‌ره كرن، ره‌وشا نها یا رۆژئاڤا كوردستانێ د جڤینێ ده هات ببیرئانین و برێڤه‌برێ به‌شا رۆژئاڤا نه‌ینه‌وا یا ئیستخباراتا ئیراقێ عه‌قید موزاحم شه‌مه‌ری ژ عومه‌ر ئیبراهیم سه‌رۆكێ PADÊ پرسی یه هه‌گه‌ر ئالۆزی دژوار بوون و پێله‌كه كۆچبه‌ریێ به‌ر ب شه‌نگالێ هات هوونێ چ بكن؟، د به‌رسڤێ ده عومه‌ر ئیبراهیم گۆ كو هه‌یا نها تشته‌كی ووسا ل هۆلێ تونه، لێ هه‌گه‌ر قه‌ومی و كۆچبه‌ر وه‌رن، ئه‌مێ خزمه‌تێ ژ وان ره بكن.
ل گۆری چاڤكانیێن «داركا مازی»، عه‌قید موزاحم شه‌مه‌ری باجه‌ك ژ عومه‌ر ئیبراهیم ره چێكر ژ بۆ كو سه‌رراست ل زالگه‌هـ و نوقته‌یێن ئارتێشا ئیراقێ هاتنوچووینێ بكه و نه‌یێ ئاسته‌نگ كرن.
پاش جڤینێ و ل هه‌مان رۆژێ واته ل 22 ته‌باخا 2022ێ، عومه‌ر سالح، ب ئالیكاریا ئیستخباراتا ئیراقێ شانده‌كه رۆژنامه‌ڤانێن بیانی ده‌رباسی شه‌نگالێ كرنه، ئه‌و رۆژنامه‌ڤان ژ بۆ سازكرنا فلیمه‌كه دوكیۆمێنتاری ده‌ربارێ جه‌نۆسیدا كوردێن ئێزدی به‌رێ خوه دابوونه شه‌نگالێ.
