ژ رۆژا یەکەما خوەپێشاندانێن رۆژھلاتێ کوردستانێ ھەتا نھا، 22 کەسان جانێ خوە ژ دەست دانە، کو ژ وان ناڤێن 15 کەسان ئەشکەرە بوونە، ھەروھا 733 کەس ژی بریندار بوونە.
خوەپێشاندان و نیشاندانا نەرازیبوونێ ل رۆژھلاتێ کوردستانێ و ب دەھان باژارێن ئیرانێ و ب تایبەتی ژی ل باژارێن مەزن ددۆمن، ھەژمارا قوربانیان ژی ل رۆژھلاتێ کوردستانێ زێدە دبە.
نیشاندانا نەرازیبوونێ پشتی کوشتنا ژینا ئەمینی ژ ئالیێ پۆلیسێن تەھرانێ ڤە سەری ھلدا، ناڤەندا ھەڤکاریا پارتیێن کوردستانا ئیرانێ ژ وەلاتیان داخواز کر کو رۆژا دوشەمبێ 19ێ ئیلۆنێ گرەڤا گشتی برێڤە ببن و نەچن سەر کارێن خوە.
پشتی وێ بانگەوازیا رۆژا دوشەمبێ، ل 24 باژارێن رۆژھلاتێ کوردستانێ گرەڤ ھاتن کرن. ئێڤارا وێ رۆژێ ل 13 باژاران خوەپێشاندان ھاتن کرن و د ئەنجاما مداخەلەیا ھێزێن ئەولەھیێ ڤە ل 12 باژاران خوەپێشاندان بەر ب توندووتووژیێ ڤە چوون.
رۆژا دن ژی خوەپێشاندان ل 14 باژارێن رۆژھلاتێ کوردستانێ بەردەوام بوون و ل 8 باژاران ھێزێن ئەولەھیێ تەقە ل خەلکێ کرن.
ل سەر بانگا چالاکڤان و رێخستنێن سڤیل، خوەپێشاندان ئێڤارا چارشەمبێ ژی ل 14 باژاران بەردەوام بوون و ل 12 باژاران ھێزێن ئەولەھیێ رووبروویی خەلکێ بوون.
د ئەنجاما خوەپێشاندانێن ڤان چەند رۆژان دا ھەتا نھا ھەری کێم 22 کەس کو ناڤێن 15 کەسان ئەشکەرە بوونە، ل رۆژھلاتێ کوردستانێ ب تەقەیێن راستەراستێن ھێزێن ئەولەھیێ ڤە ھاتن کوشتن. ھەروھا د ناڤا ڤان چەند رۆژان دە ھەری کێم 733 کەس ژی بریندار بوون و نێزیکی ھەزار کەس ژی ھاتن دەستەسەرکرن.
