کوشتنا کەچا کورد یا رۆژهلاتێ کوردستانێ ژینا ئەمینی، پێلەکە مەزن یا هێرس و خوەپێشاندانان ل رۆژهلاتێ کوردستانێ و ئیرانێ ل پشت خوە ئانیە و د خوەپێشاندانێن پارێزگەها گەیلانا ل باکورێ رۆژهلاتێ ئیرانێ، 739 کەس هاتن بنچاڤکرن.
ئاژانسا «تەسنیم» یا ئیرانی ل سەر زارێ رێڤەبەرێ ئاسایشا پارێزگەها گەیلانێ عەبدولەزیز مەلەکی بەلاڤ کر، هێزێن پۆلیس و سپایێ پاسداران 739 کەس بنچاڤ کرن کو د ناڤا وان دە، 60 ژن هەنە.
مەهسا «ژینا» ئەمینی کەچەکە کورد یا 22 سالی بوو، رۆژا 13ێ ئیلۆنا 2022ان ب برایێ خوە رە ژ باژارێ سەقزێ سەردانا تەهرانێ کربوو و ژ بەر کو حیجابا خوە ب ئاوایەکی رێکوپێک گرێ نەدایە ژ ئالیێ پۆلیسان ڤە هاتە بنچاڤکرن و پشتی دو دەمژمێران ژ بۆ نەخوەشخانەیێ هات برن و رۆژا 16ێ مەهێ ل نەخوەشخانەیێ جانێ خوە ژ دەست دا.
مالباتا ژینا و چالاکڤانێن رۆژهلاتێ کوردستانێ دبێژن، ژینا د بن ئەشکەنجەیێ دە هاتیە کوشتن. لێ پۆلیس ژی دبێژە، ژینا ژ بەر جەلتەیا دل جانێ خوە ژ دەست دایە.
کوشتنا ژینا ئەمینی گەلەک کارڤەدانێن بەرفرەهیێن ل سەر ئاستا ناڤخوە و ناڤدەولەتی ل پشتی خوە ئانین و خوەپێشاندان ل باژارێ سەقز، ئورمیە، مەهاباد و پیرانشار و باژارێن دن یێن رۆژهلاتێ کوردستانێ و هەژمارەک ژ باژارێن ئیرانێ دەرکەتن و هەتا نها زێدەتر ژ 50 کەسان ژ ئالیێن هێزێن ئەولەهیێ ڤە هاتنە کوشتن، ب سەدان کەس ژی هاتنە بریندارکرن و بنچاڤکرن.
رێخستنا لێبۆرینێ یا ناڤدەولەتی (ئامنەستی ئنتەرناشیۆنال) دەربارێ بێدەنگکرنا خوەپێشاندانان ژ ئالیێ هێزێن ئەولەهیێ یێن ئیرانێ ڤە داخواز ژ جڤاکا ناڤدەولەتی کر “کارەکی واتەدار” بکن، ژ بۆ رێ ل بەر خوینرژاندنا زێدەتر وەرە گرتن.
