ئیران ژ بۆ رۆژا دویەم ل سەر ھەڤ ناڤچەیێن سینۆری یێن ھەرێما کوردستانێ تۆپباران دکە و وەلاتیێن ناڤچەیێن سینۆری ژی گوندێ خوە ڤالا دکن.
تۆپخانەیا ئیرانێ ئیرۆ 25ێ ئیلۆنا 2022یێ ژ بۆ رۆژا دویەم ل سەر ھەڤ ناڤچەیێن چیایی یێن زۆزانێن «ھۆرنێ» ل ناحیا سیدەکانێ یا ل دەڤەرا برادۆست تۆپباران دکە.
ژ بەر تۆپبارانا ئیرانێ، ھەژمارەک مەزن ژ وەلاتیێن گوندێن سینۆری یێن ل ناحیا سیدەکانێ ژ مالێن خوە دەرکەتنە و بەرێ خوە دانە دەڤەرێن دن.
دەربارێ ھەبوونا بارەگەھێن پارتیێن پارچەیێن دنێن کوردستانێ ل وێ دەڤەرێ، رێڤەبەرێ ناحیا سیدەکانێ ئیحسان چەلەبی راگهاند، چ بنکە و بارەگەھێن پەکەکێ یان پارتیێن رۆژھلاتێ کوردستانێ ل دەڤەرا وان نینە.
ژ ئالیەکی دن ڤە، ئەڤ رۆژا سێیەمینە دەریێ دبستانا گوندێ بنێ رەشکین ل ناحیا سیدەکانێ ژ بەر تۆپبارانا ئیرانێ ڤە گرتییە.
دوھی ژی تۆپخانەیا ئیرانێ زۆزانێن بەربزین و ھۆرنێ و گورێ سایەیێن ل ناحیا سیدەکانێ دابوو بەر تۆپان.
سوپایێ پاسدارێن ئیرانێ ژی دوھی د داخویانیەکێ دا ھشیاری دا وەلاتیێن ھەرێما کوردستانێ کو ئەو بارەگەھێن پارتیێن دژبەرێ وەلاتێ خوە دکە ئارمانج، ژ بەر وێ ژی دڤێ ئەو ژ بارەگەھێن پارتیان نێزیک نەبن.
