د رۆژا نەهەما خوەپێشاندانێن خەلکێ رۆژهلاتێ کوردستانێ و ئیرانێ ل هەمبەر کوشتنا ژینا ئەمین ژ ئالیێ پۆلیسێ تەهرانێ ڤە، جارەکە دن بەشەکە مەزن ژ خەلکێ باژارێن مەزن داکەتن سەر کۆلانان. هەڤدەم ژی، ل هەژمارەک وەلاتان خوەپێشاندان ژ بۆ پشتەڤانیا خوەپێشاندانێن ل ناڤا ئیرانێ تێن کرن.
ل گۆری وێنە و ڤیدیۆیێن ل تۆرا جڤاکی هاتنە بەلاڤکرن، دوهی 25ێ ئیلۆنێ خوەپێشاندان ل هەژمارەک باژارێن رۆژهلاتێ کوردستانێ و ئیرانێ، وەک سنە، تەهران، کەرەج، بۆشەهر، شیراز، لاهیجان و تەوریزێ بەردەوام بوون. خوەپێشاندەران دروشمێن ل دژی حکوومەتێ گۆتن و ل هن جهان ژی ژنان حیجابا خوە شەوستاندن.
دوهی یەکشەمێ، ل باکورێ ویلایەتا كالیفۆرنیا یا ئه‌مەریکا ب هەزاران کورد و ئیرانیان وێنەیێن ژینا ئەمین بلند کرن و ب گۆتنا سلۆگانێن وەک «ژن، ژیان، ئازادی» «ئەم کۆمارا ئیسلامی ناخوازن» و «ئەم هەموو ژینا (مەهسا)»نە، پشتگریا خوە ژ بۆ خوەپێشاندانێن د ناڤا ئیرانێ دە نیشان دان.
د رۆژێن بۆری دە، کورد و ئیرانیێن ل باژارێن واشنگتۆن، نیۆیۆرک، شیكاگۆ خوە پێشان دان و نەرازیبوونا خوە نیشان دان.
هەروه‌ها ئەو تەڤگەرا نیشاندانا نەرازیبوونێ ل هەژمارەک وەلاتێن جیهانێ ژی هاتە کرن. ل براتسلاڤا پایتەختا سلۆڤاکیایێ ژی د کەشوهەوایەکە باران دە، خوەپێشاندان ب بلندکرنا وێنەیێن ژینا ئەمین هاتە کرن.
د وێ خوەپێشاندانێ دە ژی، دەرهێنەرێ ئیرانێ یێن ناڤدار محەمەد عەلی تالبی د گۆتارەکێ دە، رەخنە ل رەوشا نها یا ئیرانێ و حکوومەتا وی وەلاتی گرت.
هەلوەستێن ناڤدارێن ئیرانێ
ب بەردەوامیا خوەپێشاندانان دە، گەلەک هەلوەست و کارڤەدان ژ ئالیێ هونەرمەند، وەرزشڤان و کەسایەتیێن ناڤدارێن ئیرانێ دەرکەتن.
وەرزشڤانێ ناڤدارێ ئیرانی، لەهەنگێ زۆرنبازیێ سامان عەبدولی د پەیامەکە ڤیدیۆیی دە ل ئه‌كاونتا خوە یا تۆرا جڤاکی «ئنێستاگرام» بەلاڤ کر و رەخنە ل بکارئانینا توندوتویژیا ل دژی خوەپێشاندەران گرت.
سامان عەبدولی گۆتنا خوە ئاراستەیی بەرپرسێن حکوومەتا ئیرانێ کر و گۆت: «ژ بۆ چ هوون توندوتیژیێ دکن؟ ئەڤ نە رفتارا مرۆڤانە. چما هوون بێرێزیێ ل ژنان دکن؟ ما پەیاتی وهایە»؟
ژ ئالیەکی دن ڤە، ئه‌کتەرا ناڤدارا سینەمایێ باران کەوسەری کو خوەدیا چەندین خەلاتێن سینەمایی ل سەر ئاستا ناڤخوەیا ئیرانێ و وەلاتێن جیهانێ یە، پەیامەک ل ئنێستاگراما خوە بەلاڤ کر و رەخنە ل بەرپرسێن ئیرانێ گرت.
باران کەوسەری نڤیسی: «هوون نە هێژایی خوەپێشاندانێن ئاشتیانە یێن سێ ملیۆن کەسی بوون. ئەگەر نیشاندانا نەرازیبوونێ ل هەمبەر پاشکەفتن و گوللـەیێن وە، ئاژاوە بە، ئەز ژی وەک باران کەوسەری ئاژاوەگەرم».
نها تۆرا ئنێستاگرامێ ژ تۆرێن دن زێدەتر ل ئیرانێ بەربەلاڤە، ژ بەر وێ لیستکڤانێ تۆپاپێ یێ ئیرانی سەردار ئازموون د پەیامەکێ دە بەلاڤ کر: «ژ بۆ وە روورەشی یە کو هوون گەلەکی ب هێسانی مرۆڤان دکوژن، بژی ژنێن ئیرانێ».
