ئیرۆ 27/9/202 یێ ب ئامادەبوونا سەرۆکێ حکوومەتا ھەرێما کوردستانێ مەسروور بارزانی ڤە مەراسیما دانینا خیم و بەرێ بنگەھینێ چەند پرۆژەیێن خزمەتگوزاریێ ل سینۆرێ ئیدارەیا سەربخوەیا زاخۆ ب 26 ملیار و نیڤ دیناران دەستپێ کر و سەرۆکێ حکوومەتێ ژی گۆتارەک پێشکەش کر.
د گۆتارا خوە دا سەرۆکێ حکوومەتا ھەرێما کوردستانێ مەسروور بارزانی راگەھاند، ژ بەر جارەکە دن سەردانا دەڤەرێ کریە بەختەوەرە کو دێ ل زاخۆکا دەلال بەرێ بنگەھینێ ھن پرۆژەیێن نوو داینە و سالڤەگەرا یەکەما بوونا ئیدارەیا سەربخوەیا زاخۆیێ ل ھەموو ئالیەکی پیرۆز کر و گۆت، ھێڤیدارم بەرپرسێن ئیدارەیێ د خزمەت کرنێ دە بەردەوام بن.
مەسروور بارزانی گۆت: د دەما بۆری دە گەلەک پرۆژە د وارێن رێ و سەکتۆرا پەروەردە، تەندورستی و سەکتۆرا گەشتیاریێ دا ھاتنە ئەنجامدان. لێ مخابن ئەو خزمەتێن لاییقی خەلکێ زاخۆ بوون ھەتا نھا نەھاتبوون کرن. پێویستە خزمەتا خەلکێ مە بێ کرن و تشتا کو ئەم بکارن بکن ژ بۆ باش کرنا ژیانا خەلکێ زاخۆ و ئاوایێ باژارڤانییێ ل زاخۆ ئەم بێخەمیێ ناکن و ئینشالا ئەمێ بەردەوام بن.
سەرۆکێ حکوومەتێ راگەھاند، دێ ھندەک پرۆژە کەڤن وارێ جێبەجێکرنێ و ھندەک پرۆژە ژی ھەنە دێ پاشەرۆژێ دا هێن ئەنجامدان، کو ئەو ژی بجیھانینا شەقاما 60 مەترییا زاخۆ، نەخواشخانەیا قەزا باتیفا و ناڤچەیا پیشەسازیا زاخۆ کو ھەموو دێ ببن دەرفەت. ھەم دەرفەتا کار ژ بۆ خەلکێ زاخۆیێ دێ ئاڤا بکە، ھەم ژی دێ ئالیکاربن ژ بۆ پێشخستنا وارێ ئابۆری. ژ بەر وێ ژی تەنێ نە ل زاخۆ، دێ ل ھەموو کوردستانێ ژی ئەو خزمەت بەردەوام بن.
مەسروور بارزانی گۆت، زاخۆ ژ بۆ مە گرنگە، دەڤەرا زاخۆ ب ئاوایەکی گشتی دەڤەرەکا گرنگە. گەلەک قوربانی ژ بۆ پاراستنا ھەرێما کوردستانێ دانە. ئەو تەڤگەرێن شۆرەشی یێن ل کوردستانێ ل دوو ھەڤ ھاتنە کرن ل ڤێ دەڤەرێ و ژ بەر وێ ژی ڤێ دەڤەرێ گەلەک قوربان دانە. ئەز نھا ل ڤێ دەرێ باب و کەسووکارێن گەلەک شەھیدان دبینم. نھا ڤێ دەرێ راوەستانە و ئامادە نە. ئەز ب رێزداری سەرێ خوە ل بەر وان دچەمینم. ھێڤیدارم خوەدێ تەمەنەکی درێژ بدە وان و پشتەڤانبن بۆ ئیدارەیا خوە کو ئیدارەیا سەربخوەیا زاخۆ ژی د خزمەتا وە دا بە.
سەرۆکێ حکوومەتێ دیار کر، خەلکەکێ زێدە ھەیە ل زاخۆ خوەدی شەھیدە و زەحمەتیێن مەزن کێشانە. وەکی پرانیا ناڤچەیێن دنێن کوردستانێ و وان ژی بێخەمی نەکرنە د پێشخستنا دەستکەفتێن کوردستانێ دە. ھەر خزمەتەکی ژ بۆ ڤێ دەڤەرێ بێ کرن مافێ وانە و لاییقن و پێویستە رۆژ ب رۆژ قاسی کو ئەم بکارن دڤێ دەڤەرا زاخۆ پێش بخن.
