رێخستنا په‌كه‌كێ وه‌كه هه‌رتم، ئیرۆ ژی هنه‌ك ده‌ره‌و پارڤه‌كرن و د مه‌دیایا خوه ده گۆت كو «لێكۆله‌رێن ئه‌ورۆپی یێن ژ بۆ ته‌عقیبا بكارئانینا چه‌كا كیمیایی ژ هێلا ده‌وله‌تا ترك ڤه هاتنه كانی ماسێ، ژ هێلا په‌ده‌كێ ڤه رێ ل وان هاتیه گرتن».
چه‌ند رۆژان به‌رێ، دو لێكۆله‌رێن چه‌كێ كیمیایی «جان فان ئاكینی» یێ ئه‌لمانی و «جۆزێف ساڤاری» یێ ژ سویسرایێ، ژ بۆی كۆمكرنا هنه‌ك زانیاریان ده‌ربارێ چه‌كێ كیمیایی یێ ل سه‌ر ده‌ما ره‌ژیما سه‌دام ل باشوورێ كوردستانێ هاتیه بكارئانین، وه‌كه كه‌س ئانگۆ ب ئاوایه‌كی نه‌فه‌رمی سه‌ردانا باشوورێ كوردستانێ كرنه، لێبه‌لێ رێخستنا په‌كه‌كێ هاتنا ڤان دو لێكۆله‌ران وه‌كه فه‌رسه‌نده‌كی ژ خوه ره دیت ژ بۆ كو هنه‌ك ده‌ره‌وان ب ناڤێ وان بكه و ب ریا وان ئێریشێ حكوومه‌تا هه‌رێما كوردستانێ بكه.
رێخستنا په‌كه‌كێ ب ناڤێ لێكۆله‌ران به‌لاڤ كر كو وان دخوه‌ست ده‌رباسی ناڤچه‌یا كانی ماسێ و گوندێ هرۆرێ ببن ژ بۆی ته‌عقیبا بكارئانینا چه‌كێ كیمیایی ژ هێلا ده‌وله‌تا ترك ڤه، لێ به‌لێ ژ هێلا قائیمقامێ ئامێدیێ ڤه رێ ل به‌ر وان هاتیه گرتن.
چاڤكانیێن پێگه‌ها «داركا مازی» ده‌ربارێ هاتنا لێكۆله‌ران بۆ كانی ماسێ ئه‌شكه‌ره كرن، ژ به‌ركو وان دخوه‌ست ده‌رباسی ناڤچه‌یه‌كه خه‌ته‌ر ببن، هه‌موه‌خت تو ده‌ستوورێن فه‌رمی یێن حكوومه‌تێ پێره نه‌بوون، رێ ب وان نه‌هات دایین ئه‌و ده‌رباس ببن.
هه‌روه‌ها ده‌ستنیشان كرن، سه‌ده‌ما سه‌ره‌كه یا پێشی گرتنا ل به‌ر لێكۆله‌ران بۆ ده‌رباسبوونا كانی ماسێ و هرۆرێ سه‌لامه‌تیا وان بوو، ژ به‌ر كو ناڤچه‌یێن كو وان دخوه‌ست بكه‌ڤنێ، ده‌وام ژ هێلا ده‌وله‌تا ترك ڤه تێن بۆمبه‌باران كرن، لوما ژ بۆ كو خه‌ته‌ری نه‌كه‌ڤه سه‌ر ژیانا وان، رێ ل به‌ر وان هاتیه گرتن.
لێكۆله‌رێن ئه‌لمانی و سویسری، هه‌روها سه‌ردانا ئۆفیسا سلێمانیێ یا پارلمه‌نتۆیا كوردستانێ كرن و ل ور ئارمانجا سه‌ردانا خوه یا ژ بۆ باشوورێ كوردستانێ ئه‌شكه‌ره كرن و گۆتن كو وان سه‌ردانا مۆنۆمێنتا ئه‌نفالێ یا ل چه‌مچه‌مالێ كریه، هه‌موه‌خت بكارئانینا چه‌كێ كیمیای یێ سه‌رده‌ما ره‌ژیما سه‌دام ل ئۆفیسا پارلمه‌نتۆیێ نیقاش كرنه.
پشتره د كۆنگره‌یه‌كا رۆژنامه‌ڤانی دا وان ئاخڤی و ده‌ره‌وا كو په‌كه‌كێ ب ناڤێ وان كری، ئیفشا كرن، وان تو به‌حس ل سه‌ردانا كانی ماسێ و پێشی گرتنا ل خوه نه‌كر.
رێخستنا په‌كه‌كێ د خوه‌ست ب ریا ڤان دو لێكۆله‌رێن ئه‌ورۆپی، ئێریشا حكوومه‌تا هه‌رێما كوردستانێ بكه، لێ وه‌كه هه‌رتم ده‌ره‌وان وان ده‌وام نه‌كر و هه ر دزوو ده ئیفشا بوو.
