سەرۆکوەزیرێ هەرێما کوردستانێ مەسروور بارزانی ئیرۆ چارشەمێ 28.09.2022 تەکەز کر، حکوومەتا هەرێمێ دێ هەولا دابینکرنا مالان ژ بۆ هەموو مالباتێن شەهیدان ل سەرانسەرێ کوردستانێ بدە.
سەرۆکوەزیرێ هەرێما کوردستانێ مەسروور بارزانی ئیرۆ 28ێ ئیلۆنا 2022ان ل دهۆکێ د مەراسیمەکێ دە کو ژ ئالیێ دەزگەها خێرخوازی یا بارزانی ڤە هاتیە برێکخستن دە، 420 شوقە ل مالباتێن شەهیدێن کوردستانێ دابەش کرن.
سەرۆکوەزیر د مەراسیمێ دە گۆتارەک پێشکێش کر و تێ دە راگهاند، «ئەمێ هەول بدن د پاشەرۆژێ دە هەموو مالباتێن شەهیدان ببن خوەدی خانی، نە تەنێ ل دهۆکێ، لێ ل هەموو باژار و باژارۆکێن کوردستانێ. ئارمانجا مە ئەوە، ت مالباتەکە شەهیدان د خانیێن ب کرێ دە نەمینن».
سەرۆکوەزیر مەسروور بارزانی دەربارێ هۆکارا دامەزراندنا دەزگەها خێرخوازی یا بارزانی دە گۆت: «جەنابێ بارزانیێ نەمر، باڤێ نەتەوی و نشتمانی یێ مەیە، وی ژیانا خوە ژ بۆ خزمەتا گەلێ خوە و ئازادیا گەلان تەرخان کر. وەک دلسۆزیەکێ ژ وی رە، ژ بۆ خزمەتا مالباتێن شەهیدان و خەلکێ هەژار، پشتی شێورمەندیا ل گەل جەنابێ سەرۆک بارزانی و ب فەرمانا سەرۆک بارزانی، ئەڤ دەزگەهـ هاتە دامەزراندن».
هەر وها گۆت: «ئەم سەربلندن دەما دبینن کو ئەڤ دەزگەهـ بوویە جهێ باوەریا خەلکێ ل ناڤخوەیا کوردستانێ و پارێزگەهێن ئیراق و ل سەر ئاستا ناڤدەولەتی ژی. دەزگەها خێرخوازی یا بارزانی ل نەتەوێن یەکگرتی ب فەرمی هاتیە ناسکرن و رێخستنێن بیانی ژی هەڤکاریێ پێ رە دکن».
سەرۆکوەزیر مەسروور بارزانی سپاسیا کامپانیایێن که‌رتا تایبەت، سەرمایەدار و بازرگانێن هەرێما کوردستانێ کر کو ب بەردەوامی پشتەڤانیێن ل دەزگەها خێرخوازی یا بارزانی دکن.
سەرۆکوەزیر مەسروور بارزانی د بەشەکە دن یا داخویانیا خوە دە گۆت: «جهێ سەربلندیێ یە کو ئیرۆ ل ڤر خزمەتا هەژمارەک مالباتێن شەهیدان دکن. دەزگەها خێرخوازی یا بارزانی د خزمەتا مالباتێن شەهیدان و خەلکێ هەژار ل کوردستانێ و دەرڤە ژی بەردەوامە».
سەرۆکوەزیرێ هەرێما کوردستانێ تەکەزی ل وێ یەکێ، ت ئارمانجێن سیاسی یێن دەزگەها خێرخوازی یا بارزانی نینن، ئەو بێی کو ت جوداهیەکێ بکە، دەستێ هەڤکاریێ درێژی کەسێن زیاندیتی و هەژار دکە.
