سەرۆکاتیا حکوومەتا ھەرێما کوردستانێ راگھاند، بەزاندن و بنپێکرنا سەروەریا ھەرێما کوردستانێ ب مووشەکبارانێ، ب توندی شەرمەزار دکن.
سەرۆکاتیا حکوومەتا ھەرێما کوردستانێ د داخویانیەکێ دا راگھاند، بۆمبەبارانکرنا بارەگەھێن ئۆپۆزیسیۆنێ ب مووشەکان ژ ئالیێ کۆمارا ئیسلامی یا ئیرانێ ڤە ب ھەر بھانەیەکێ، ھەلوەستەکا نەراستە و ژ بۆ ژ رێ دەرخستنا ئاراستەیا بوویەرانە و جھێ ماتمایینێ یە.”
سەرۆکاتیا حکوومەتا ھەرێما کوردستانێ راگھاند ژی، “ئێریشێن ب ڤی ئاوایی کو بەردەوام ل سەر ئاخا مە تێن کرن و د ئەنجامێ دا خەلکێ سڤیل ژی دبن قوربانی، ئەم شەرمەزار دکن و پێویستە داوی ل وان دەستدرێژیان بێ ئانین.”
ئیرانێ ئیرۆ ب رێیا درۆنەیێن بۆمبەکری و مووشەکان ئێریشی سەر بارەگەھێن پارتیا دەمۆکراتا کوردستانا ئیرانێ ل باژارۆکێ کۆیێ، کۆمەلەیا زەحمەتکێشان یا کوردستانا ئیرانێ ل زرگوێز ل سلێمانیێ و پارتیا ئازادیا کوردستانێ ل پردێ کرن.
ل گۆر داخویانیەکا وەزیرێ تەندروستیێ یێ ھەرێما کوردستانێ در. سامان بەرزنجی، د ئەنجاما ئێریشێن ئیرانێ دا ھەتا نھا 7 کەس شەھید بوونە و 24 کەس ژی بریندارن.
