وەزیرێ تەندروستیێ یێ ھەرێما کوردستانێ راگھاند، د ئەنجاما ئێریشێن سوپایا پاسداران ل سەر بارەگەھێن پارتیێن رۆژھلاتێ کوردستانێ دا ل کۆیە و پردێ، 9 کەس شەھید بوون و 32 کەس ژی بریندار بوون.
وەزیرێ تەندروستیێ در. سامان بەرزنجی راگھاند، د ئەنجاما ئێریشێن ئیرانێ دا، ھەتا نھا 9 کەس شەھید بوونە و 32 کەس ژی بریندار بوونە.
در. سامان بەرزنجی دەستنیشان کر ژی، تێ پێشبینیکرن شەھیدێن دن ژی ھەبن، لێ ژ بەر کو گەلەک ئاستەنگی ل پێش ئامبولانسان و تیمێن ھاوارھاتنێ ھەنە، ئەو نکارن بگھن جھێ بوویەرێ.
د ڤێ ئامارێ دا ئاماژە ب ھەژمارا قوربانیێن ئێریشا سەر بارەگەھێن کۆمەلەیێن ل پارێزگەھا سلێمانیێ نەھاتیە کرن.
ئیرانێ ئیرۆ ب ریا درۆنەیێن بۆمبەکری و مووشەکان ئێریشی سەر بارەگەھێن پارتیا دەمۆکراتا کوردستانا ئیرانێ ل باژارۆکێ کۆیێ، کۆمەلەیا زەحمەتکێشان یا کوردستانا ئیرانێ ل زرگوێز ل سلێمانیێ و پارتیا ئازادیا کوردستانێ ل پردێ کرن.
