کارڤەدانێن ناڤدەولەتی ل ھەمبەر ئێریشێن ئیرانێ یێن ل سەر ھەرێما کوردستانێ

کارڤەدانێن ناڤدەولەتی ل ھەمبەر ئێریشێن ئیرانێ یێن ل سەر ھەرێما کوردستانێ

کۆنسولخانەیا گشتی یا ئالمانیایێ یا ل ھەولێرێ د تویتەکێ دا نیگەرانیا خوە دەربارێ ئێریشێن بەردەوامێن ئیرانێ یێن ل سەر ھەرێما کوردستانێ نیشان دا و داخواز کر کو ئیران دەملدەست ئێریشێن خوە راوەستینە.

کۆنسولخانەیا گشتی یا ئالمانیایێ ل سەر حەسابا خوەیا تویتەرێ راگھاند: “ئەم نیگەرانن ژ ئێریشێن بەردەوامێن ئیرانێ یێن ل سەر ھەرێما کوردستانێ. ئەم ژ بۆ قوربانیێن سڤیلێن بێتاوان خەمگینن. ئەڤ ئێریش بنپێکرنا بێ ھنجەتا سەروەری و یەکپارچەبوونا ئاخا ئیراقێ نە. ئەم ژ ئیرانێ داخواز دکن، دەملدەست ئێریشێن خوە راوەستینە.”

کۆنسولێ گشتی یێ بریتانیایێ ل ھەولێرێ دەیڤد ھونت ژی ل سەر توتتەرێ راگھاند: “بریتانیا ئێریشێن بەردەوامێن ئیرانێ یێن ل سەر ھەرێما کوردستانێ شەرمەزار دکە، کو بنپێکرنا بێ ھنجەتا سەروەریا ئیراقێ یە. ئەم ژ بەر جانژدەستدانا وەلاتیێن سڤیل خەمگینن.”

دەڤید ھونت دەستنیشان کر، بریتانیا پشتەڤانیکرنا سەروەری و ئاساییشا ئیراق و ھەرێما کوردستانێ ددۆمینە.

نوونەرتیا نەتەوەیێن یەکبوویی یا ل ئیراقێ (UNAMI) تۆپبارانێن ئیرانێ یێن سەر ناڤچەیێن ھەرێما کوردستانێ شەرمەزار دکە و داخواز دکە کو دەملدەست تۆپباران بهێن راوەستاندن.

یونامی دەستنیشان کر کو ئەنجامێن دیپلۆماسیا رۆکەتان وێرانکەر دبە و گۆت: “ئیراق و ھەرێما کوردستانێ وێ یەکێ رەد دکن کو وەکە “حەوشا پشت مالێ” لگەل وان سەرەدەری بهێت کرن، کو ب ئاوایەکێ ئاسایی ژ ئالیێ جیرانێن خوە ڤە سەروەریا وان بهێت بنپێکرن بێیی چ سزادانەکێ.”

ئیرانێ ئیرۆ چارشەمێ 28 ئیلۆنا 2022یێ، ب ریا درۆنەیێن بۆمبەکری و مووشەکان ئێریشی سەر بارەگەھێن پارتیا دەمۆکراتا کوردستانا ئیرانێ ل باژارۆکێ کۆیێ، کۆمەلەیا زەحمەتکێشان یا کوردستانا ئیرانێ ل زرگوێز ل سلێمانیێ و پارتیا ئازادیا کوردستانێ ل پردێ کرن.

وەزیرێ تەندروستیێ یێ ھەرێما کوردستانێ راگھاند، د ئەنجاما ئێریشێن سوپایێ پاسداران ل سەر بارەگەھێن پارتیێن رۆژھلاتێ کوردستانێ دا ل کۆیە و پردێ، 9 کەس شەھید بوون و 32 کەس ژی بریندار بوون.

پوستێن ھەمان بەش