خوەپێشاندانێن جەماوەری یێن ل رۆژھلاتێ کوردستانێ و ئیرانێ ل دژی رەژیما تەھرانێ بەردەوام دکن

خوەپێشاندانێن جەماوەری یێن ل رۆژھلاتێ کوردستانێ و ئیرانێ ل دژی رەژیما تەھرانێ بەردەوام دکن

ل باژارێ سەردەشتێ یێ رۆژهلاتێ کوردستانێ یەک ژ فەرماندارێ پایەبلندێن سوپایێ پاسدارێن ئیرانێ یێ ب ناڤێ «مۆحسن ئەلوەند» ژ ئالیێ جوانێن کورد ڤە ھاتە کوشتن.

ل گۆری دیمەنێن کو ل سەر تۆرێن جڤاکی ھاتنە بەلاڤکرن، شەڤا بۆری خەلکێ رۆژھلاتێ کوردستانێ و ئیرانێ خوەپێشاندانێن ل دژی رەژیما تەھرانێ بەردەوام کرن.

ل رۆژھلاتێ کوردستانێ گەلێ سنە د شەڤا 12ێ دا داکەتن کۆلانان و ب درووشمەیێن ل دژی رەژیما ئیسلامی یا تەھرانێ داخوازا ئازادی و وەکھەڤیێ کرن.

ل باژارێ سەردەشتێ یێ پارێزگەھا ئورمیێ یا رۆژھلاتێ کوردستانێ، خوەپێشاندەر جارەکە دن داکەتن قادان و نەرازیبوونا خوە ل ھەمبەر سیاسەتێن زۆردارێن رەژیما ئیرانێ نیشان دان. ل گۆری ئاگاھیان، فەرماندەیەکی پایەبلندێ سوپایێ پاسدارێن ئیرانێ ب ناڤێ مۆحسن دالوەند کو بەرپرسێ پاراستنا زانیاریێن دەزگەھا ئیستخباراتا پاسداران بوو، ل سەردەشتێ ژ ئالیێ جوانێن کورد ڤە ھات کوشتن. مۆحسن دالوەند رۆلەکە مەزن د تەپەسەرکرنا خوەپێشاندانێن سەردەشتێ دا هەبوو.

ل مەریوانێ ژی خوەپێشاندەران نڤێسینگەها “شیڤا قاسمیپوور” کو یەک ژ پارلەمەنتەرێن جڤاتا ئیسلامی یا ئیرانێ یە شەوتاند، ئەڤ پارلامانتەرە ل دژی خوەپێشاندانێن جەماوەری یێن رۆژهلاتێ کوردستانێ و ئیرانێ بوو.

ل گۆری چاڤکانیێن نووچەیان یێن تایبەت ب رۆژھلاتێ کوردستانێ ڤە، حکوومەتا لەشکەری ل ھەموو باژارێن رۆژھلاتێ کوردستانێ و ئیرانێ هاتیە راگهاندن و رەژیما ئیرانێ ژی گەلەک ھێز ژ بۆ تەپەسەرکرنا خوەپێشاندانێن ڤان باژاران ب جھ کریە. ل گۆری ئاگاھیان، ئەڤ رەوش ل باژارێ شنۆیێ پارێزگەھا ئورمیێ گەلەکی بەرچاڤە.

پشتی کو ئیرۆ پاسدارێن ئیرانێ ب مووشەک و فرۆکەیێن بێ فرۆکەڤان ئێرشی بارەگەھێن پارتیێن سیاسی یێن رۆژھلاتێ کوردستانێ کرن، تێ پێشبینیکرن کو د رۆژێن پێش دا خوەپێشاندان و نەرازیبوون ل باژارێن رۆژهلاتێ کوردستانێ زێدەتر ببن. سەرۆکێ حزبا دەمۆکرات مستەفا ھجری بانگ ل خەلکێ کر کو ھێرسا خوە ل دژی کۆمارا ئیسلامی یا ئیرانێ ل کۆلانێن رۆژھلات نیشان بدن.

ھێژایی گۆتنێیە کو رەژیما ئیرانێ ب ئارمانجا تەپەسەرکرنا خوەپێشاندانان دەست ب گرتنا خەلکێ کریە و ل گۆر ئامارێن رێخستنا مافێ مرۆڤان یا ھانگاو، تەنێ ل باژارێ ئورمیێ 11 ھەموەلاتی ژ ئالیێ پاسدارێن ئیرانێ ڤە ھاتنە گرتن.

ل گۆری نووچەیا ھانگاو، ب دەھان کەچ و ژنێن کورد ل باژارێن رۆژھلاتێ ئیرانێ ژ ئالیێ ھێزێن ئەولەھیێ یێن رەژیمێ ڤە ھاتنە گرتن.

ل گۆر ھانگاوێ؛ ل ئیرانێ ژ رۆژا دوشەمبێ ھەتا ئینێ زێدەتر ژ 70 کەچ و ژنێن کورد ل باژارێن جودایێن رۆژھلاتێ کوردستانێ ھاتنە دەستبسەرکرن کو ھەری کێم 4 ژ وان کەچان زارۆکێن د بن تەمەنێ 18 سالیێ دا نە.

هەنگاوێ ناسنامەیا ڤان 4 کەچان ب ڤی ئاوا ئەشکەرە کریە؛ ئیلاھە مۆئمینی 16 سالی، نیلۆفەر قازی 17 سالی، سارا شەردل 18 سالی و ئادا دەرویشی 17 سالی یە.

ھەڤدەم، خوەنیشاندانێن ل سەرانسەری ئیرانێ بەردەوام بوون، ب تایبەتی ل پارێزگەھێن تەھران، تەبریز، کەرەج، شیراز، ساری، سیستان و بەلووچستانێ، کو ژن و جوان داکەتن کۆلانان و درووشمێن ل دژی خامنەیی و رەژیما ئیسلامی بلند کرن و داخوازا ھلوەشاندنا کۆمارا ئیسلامی کرن. .

ل باژارێ «چابەھار» یێ سەر ب پارێزگەھا سیستان و بەلووچستانێ، خەلکێ بەلووچ چەند بارەگەھێن لەشکەری و حکوومەتێ یێن رەژیما ئیرانێ شەوتاندن و ژ بەر ئاشکەرا بوونا دەستدرێژییا سێکسی یا بەرپرسەکی سوپایێ پاسدارێن ئیرانێ ل سەر کەچەکا بچووک یا بەلووچ، تێ پێشبینیکرن خوەپێشاندان ل باژارێ سیستان و بەلووچستانێ زێدەتر ب گۆر ببن.

هەڤدەم، خوەندەکارێن زانینگەھ و دبستانێن ئیرانێ دەست ب گرەڤێ کرنە و مامۆستا و خوەندەکاران ژی چوونا دەرسێ رەد کرنە. ل گەل زانینگەھێن مەزنێن ئیرانێ گرەڤێن زانینگەھێن رۆژھلاتێ کوردستانێ ژی بەردەوام کرن.

هێژایی گۆتنێ یە کو گرەڤ وەکە قۆناغەکا نوو د خوەپێشاندانێن رووخاندنا رەژیما ئیرانێ دا تێ بناڤکرن و کەدکارێن پیشەسازیا پەترۆلێ و بازارێن تەھران و باژارێن دنێن مەزن گەفا گرەڤێ دخون.

پوستێن ھەمان بەش