دژە تەرۆرا کوردستانێ راگهاند، سپایێ پاسداران یێ ئیرانێ ب 4 قۆناغان ئێریشێن مووشەکی ل سەر هەرێما کوردستانێ ئەنجام دانە، ژ بەر ڤێ هەتا نها 13 کەس شەهید بوونە و 58 کەس ژی بریندار بوونە.
دژە تەرۆرا کوردستانێ دوهـ رۆژا چارشەمبێ 28ێ ئیلۆنا 2022ێ، ب داخویانیەکێ راگهاند: «ل گۆر زانیاریێن دژە تەرۆرا کوردستانێ، دوهـ رۆژا چارشەمبێ بەریا نیڤرۆ د دەمژمێر 10:15 خولەکان دە، سپایێ پاسداران یێ کۆمارا ئیسلامی یا ئیرانێ ب 4 قۆناغان رێزە ئێریش ب رێیا مووشەکێن بالیستیک و فرۆکەیێن بێفرۆکەڤانێن بۆمبەکری بۆ سەر بارەگەهێن پارتیا ئازادیا کوردستانێ یا ل پردێ، کەلەها دەمۆکراسیێ یا حیزبا دەمۆکراتا کوردستانا ئیرانێ ل باژارێ کۆیە، بارەگەها کۆمەلەیا زەحمەتکێشان یا کوردستانا ئیرانێ و کۆمەلەیا شۆرەشگەرێن زەحمەتکێشان یا کوردستانا ئیرانێ ل سلێمانیێ، کامپێن نشتەجیبوونێ یێن کوردێن رۆژهلات ل زرگوێز، زرگوێزەلە و بانەگەورە یێن ل پارێزگەها سلێمانیێ و کامپێن ئازادی و قەلا و ئەمیریە یێن ل کۆیە کرن ئارمانج».
دژە تەرۆرا کوردستانێ ئەشکەرە کر: «د ئێریشان دە زێدەتری 70 مووشەکێن بالیستیکێن جوورەیا فاتیح و فرۆکەیێن بێفرۆکەڤانێن بۆمبەکری ژ ناڤ ئاخا ئیرانێ ب چار 4 هاتنە ئاراستەکرن، قۆناغا یەکەم تەنێ ب رێیا مووشەکێن بالیستیک، قۆناغا دویەم ب مووشەکێن بالیستیک و فرۆکەیێن بێفرۆکەڤانێن بۆمبەکری، قۆناخا سێیەم مووشەکێن بالیستیک ب ئالیکاریا فرۆکەیێن بێفرۆکەڤانێن چاڤدێریێ و قۆناغا چارەم تەنێ ب رێیا مووشەکێن بالیستیک ڤە بوونە».
هەروها هات دیارکرن: «زانیاریێن هەتا نها ئەشکەرە دکن کو ئێریش ژ ناڤچەیا سەلاس یا باوەجان یا ل پارێزگەها کرماشانێ یا هەڤسینۆرێ پارێزگەها هەلەبجەیێ، ناڤچەیا سەردەشتێ یا ل پارێزگەها ئازەربایجانا رۆژئاڤا یا هەڤسینۆرێ ئیدارەیا راپەرین هاتنە ئاراستەکرن و تێ دە جهێن گشتی یێن وەکە باخچەیێ زارۆکان، دبستان، بنکەیا تەندروستیێ، نەخوەشخانە، هۆلا بۆنە و ئاهەنگان و ئۆتۆمۆبیلێن خزمەتگوزاریێ و مالێن وەلاتیێن سڤیل هاتنە ئارمانجکرن».
دژە تەرۆرا کوردستانێ دا زانین: «ژ بەر وان ئێریشان هەتا نها 13 كه‌س شەهید بوون کو د ناڤ وان دە ژنەکە دوجانی هەیە و 58 کەس ژی بریندار بوون، کو پرانیا وان وەلاتیێن سڤیلن و د ناڤ وان دە زارۆکێن ژ 10 سالی بچووکتر و خوەندەکار و مامۆستە و رۆژنامەڤان هەنە. د هەمان دەمێ دە فرۆکەیەکە بێفرۆکەڤانا ئیرانێ، ل سینۆرێ باژارێ کۆیە، بەریا بگهیژە ئارمانجا خوە، کەتیە خوارێ».
