پێشمەرگەیەکی پارتیا دەمۆکراتا کوردستانا ئیرانێ (په‌ده‌ك-ی) کو د بۆمبەبارانا دوهـ چارشەمبێ دە چارەنڤیسا وی نە دیار بوو، ئیرۆ تەرمێ وی د بن کاڤلێن مالا وی یا هەرفتی دە هات دیتن.
ئیرۆ پێنجشەمبێ 29ێ ئیلۆنا 2022ێ بەرپرسێ ناڤەندا پێشمەرگە یا پارتیا دەمۆکراتا کوردستانا ئیرانێ (په‌ده‌ك-ی) کاوە بەهرامی ژ رووداوێ ره گۆت: ڤێ سبێ تەرمێ پێشمەرگە «ئۆسمان فەیزە» هات دیتن کو مووشەکەک ل مالا وی کەتیە و شەهید بوویە. کاوە بەهرامی گۆت: «تەنێ ئەو ب خوە شەهید بوویە و ئەندامێن دن یێن مالباتا وی سلامەتن».
د بۆمبەباران و مووشەکبارانکرنا دوهـ یا کۆمارا ئیسلامی یا ئیرانێ بۆ سەر بنگەهـ و بارەگاهێن پارتیێن رۆژهلاتێ کوردستانێ دە هەتا نها 17 کەسان جانێ خوە ژ دەست دانە و 46 کەس ژی بریندارن و تەندروستیا 10 ژ برینداران نەجیگرە.
یەک ژ وان کەسێن کو رەوشا وان یا تەندروستیێ گرانە، زارۆکێ پێشمەرگەیەکە ژن یا په‌ده‌كی یە کو پشتی جانژدەستدانا داییکا خوە ژ داییک بوویە.
د بۆمبەبارانکرنا دوهـ دە، پێشمەرگەیەکە ژنا دوجانی ب ناڤێ رەیحانە کەنانی ب دژواری بریندار ببوو و پشترە جانێ خوە ژ دەست دا. لێ زارۆکێ وێ هات رزگارکرن.
ئیرۆ پێنجشەمبێ باڤێ وی زارۆکی، زانیار رەحمانی ژ رووداوێ رە دا زانین کو ل سەر وەسیەتا داییکا وی مە ناڤێ وی کریە وانیار و گۆت: «دەما داییکا وی شەهید بوویە، ئۆکسیژەنا پێویست نەچوویە مەژیێ وی و نها تەنێ دلێ وی کار دکە».
