فەرماندارێ گشتی یێ ھەسەدێ مەزلووم عەبدی رادگھینە، ترکیێ ژ دەستپێکا ئیسال ڤە 59 جاران ئێریشی ھەرێمێ وان کریە و د ئەنجامێ دا ب دەھان کەسێن سڤیل بوونە قوربانی.
فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ل ھەژمارا خوە یا تۆرا جڤاکی “تویتەر”ێ راگھاند، ژ دەستێ ئیسال ڤە ترکیێ 59 جاران ئێریشی ھەرێمێن وان کریە و د ئەنجامێ دا ھەژمارەک شەرڤان و ب دەھان سڤیل کو د ناڤا وان زارۆک و ژن ھەنە، بوونە قوربانی.
ھەر وھا مەزلووم عەبدی بانگ ل وەلاتێن گەرانتۆرێن ناڤدەولەتی کر، ھەلوەستێ خوە ژ ڤان ئێریشان دیار بکن و سینۆرەکێ ژی ژ بۆ وان دانن.
فەرماندارێ گشتی یێ ھەسەدێ دەستنیشان کر ژی، د دو رۆژێن بۆری دا درۆنێن ترکیێ سازیێن رێڤەبەریا خوەسەر ل ھەرمێن جزیر و کۆبانێ کرنە ئارمانج و د ئەنجامێ دا 2 کارمەندێن وێ ھاتن کوشتن.
ھەر وھا دیار کر ژی، د ئێریشا ترکیێ یا ل سەر گوندێن ناحیا زرگانێ دا، 2 زارۆک شەھید بوون.
د دەما داوی دا، لگەل زێدەبوونا گەفێن ترکیێ یێن ژ بۆ دەستپێکرنا ئۆپەراسیۆنەکا لەشکەری ل رۆژئاڤایێ کوردستانێ و باکورێ سووریێ، ئێریشێن ئاسمانی یێن ب ریا درۆنان ل سەر رۆژئاڤایێ کوردستانێ و ھەرێمێن د بن کۆنترۆلا ھەسەدێ دا زێدە بوونە.
پێر 27ێ ئیلۆنا 2022یێ ژی، درۆنەکا ئارتێشا ترکیێ ئۆتۆمۆبیلەک ل نێزیکی باژارۆکێ گرکێ لەگێ یێ رۆژئاڤایێ کوردستانێ بۆمبەباران کر و د ئەنجامێ دا ھەڤسەرۆکێن ئۆفیسا داد و چاکسازیێ یا ھەرێما جەزیرەیێ زەینەب محەمەد و یلماز شێرۆ ھاتبوون کوشتن.
