ل سەر داخوازا پارتیێن رۆژهلاتێ کوردستانێ و ب ئارمانجا شەرمەزارکرنا ئێریشا ل سەر بارەگەهێن وان پارتیان ل هەرێما کوردستانێ ژ ئالیێ ئیرانێ ڤە، ئیرۆ ل پرانیا باژارێن رۆژهلاتێ کوردستانێ گرەڤا گشتی دەست پێ کریە.
خەلکێ پرانیا باژار و باژارۆکێن رۆژهلاتێ کوردستانێ ل پارێزگەهێن ئورمیە، سنە، کرمانشان و ئیلامێ، ئیرۆ بازار و دکانێن خوە گرتنە و نەچوونە سەر کارێ خوە، وەک نیشاندانا نەرازیبوونێ ل هەمبەر ئێریشا سپایێ پاسدارێن ئیرانێ ل سەر بارەگەهێن پارتیێن رۆژهلاتێ کوردستانێ، ل هەرێما کوردستانێ.
ل گۆری ژێدەرێن خوەجهی، ل تەڤاهیا باژار و باژارۆکێن رۆژهلاتێ کوردستانێ ئنتەرنێت هاتیە برین و حکوومەتا ئیرانێ هێزێن مەزن یێن ئەولەکاریێ ل باژاران بەلاڤ کرنە و ب ریا نامەیێن تەلەفۆنی گەفێ ل خوەدیێن دکانان دخوە ژ بۆ كو دکانێن خوە ڤەکن.
ئەڤ گرەڤا گشتی پشتی وێ تێ، هێزێن پاسدارێن ئیرانێ رۆژا 28ێ ئیلۆنا بۆری ب ریا درۆنەیێن بۆمبەکری و مووشەکان ئێریشی سەر بارەگەهێن پارتیا دەمۆکراتا کوردستانا ئیرانێ ل باژارۆکێ کۆیێ، کۆمەلەیا زەحمەتکێشان یا کوردستانا ئیرانێ ل زرگوێز ل سلێمانیێ و پارتیا ئازادیا کوردستانێ ل پردێ کرن.
