“ئیران پەژاکێ ژ بۆ بەرژەوەندیێن خوە بکار تینە، لەوما وێ بۆمبەباران ناکە”

پسپۆرێ سەربازی «محەمەد سالح ھەمەوەندی» راگھاند: “سەدەما سەرەکەیا بۆمبەبارانا رەژیما ئیسلامی یا ئیرانێ ل سەر بارەگەھێن پارتیێن رۆژھلاتێ کوردستانێ ل ھەرێما کوردستانێ مەبەستێن سیاسی نە، ب ئاوایەکی کو نها تەڤ پێکهاتەیێن ئیرانێ ب کورد و فارس و پێکهاتەیێن دن ژ ژیانا خوە نەرازینە و داخوازا ئازادیێ دکن، لێ کۆمارا ئیسلامی یا ئیرانێ دخوازە ب ئێریش کرنە سەر پارتیێن کوردی ل باشوورێ کوردستانێ هەڤکێشەیا سیاسی بگوهەرە، و ژ رایا گشتی یا ئیرانێ رە ببێژە ئەڤ خوەپێشاندان کۆمپلۆیەک ناڤنەتەوی یە، ئەم ئێریشی تەرۆریستان دکن! هەیا کو ئارامیا ولاتێ مە تێک نەچە.”

ل سەر پەیوەندیا پەژاک-پەکەکێ لگەل ئیرانێ ژی محەمەد سالح ھەمەوەندی دبێژە: “ئیرانێ د ھەیاما دو رۆژێن بۆری دا چەندین جاران ب فرۆکەیێن بێ فرۆکەڤان و مووشەکێن بالستیک ئێرشی بارەگەھێن پارتیێن رۆژھلاتێ کوردستانێ کرنە و د ئەنجامێ دا ھەژمارەک پێشمەرگە و ھەموەلاتی ھاتنە شەهیدکرن و بریندارکرن. لێ پرسا سەرەکە ئەڤە، چما کۆمارا ئیسلامی یا ئیرانێ د ناڤا تەڤ پارتیێن ئۆپۆزسیۆن دا ئێریشی بارەگەهێن پارتیا ژیانا ئازادی کوردستان “پەژاک”ێ نەکر؟ بێ گومان سەدەم ژ بۆ ڤێ یەکێ ڤەدگەرە کو، “پەژاک” تەڤی کو رێخستنەکە سەر ب پەکەکێ یە ژی، لێ ئەڤ رێخستن چێکریا ئیرانێ یە و بەرژەوەندیێن کۆمارا ئیسلامییا ئیرانێ دپارێزە.”

بەرامبەر ھەلوێستا بەرھەم سالح ل سەر ئێریشێن کۆمارا ئیسلامی یا ئیرانێ ژی محەمەد سالح ھەمەوەندی دبێژە: “سەرۆکۆمارێ ئیراقێ بەرھەم سالح خوە وەک پارێزڤانێ دەستوورا بنگەھینا ئیراقێ دبینە، لێ ل ھەمبەری ئێریشێن کۆمارا ئیسلامی یا ئیرانێ ھەلوەستەک جدی نیشان نەدایە و ھەلوەستا وی گەلەکی لاوازە. ژ بەر ڤێ یەکێ پشتی سێ رۆژان ژ نوو بەحسا ئێریشێن ل دژی ھەرێما کوردستانا ئیراقێ کر.”