باره‌كێ دنێ مادده‌یێ هشبه‌ر یێ په‌كه‌كێ ل سینۆری هات گرتن كو رێخستنێ هه‌ول ددا ژ رۆژئاڤا كوردستانێ ده‌رباسی شنگالێ بكه.
چاڤكانیێن تایبه‌ت یێن پێگه‌ها «داركا مازی» ئه‌شكه‌ره كرن، ئێڤارا دوهـ رۆژا شه‌می 1\10\2022ێ گرووپه‌كی گرێدای په‌كه‌كێ كو چانته‌یه‌كا پری مادده‌یێ هشبه‌ر پێ ره بوو، هه‌ول ددا ژ رۆژئاڤا كوردستانێ ده‌رباسی شنگالێ بكن، كه‌تن كه‌مینێ و ئه‌ڤ هه‌ول راستی شكه‌ستنێ هات.
ده‌ست نیشان كر، ئه‌ڤ گرووپا په‌كه‌كێ ل ساعه‌ت 5 ئێڤارا دوهـ هه‌ول دا ژ ناڤچه‌یێن سینۆرێ لیوایا 19 یا ئارتێشا ئیراقێ كو دكه‌ڤه همبه‌ری گوندێ ب ناڤێ «بئر قاسم» یێ گرێدای ناڤچه‌یا سنوونێ سه‌ر ب شه‌نگالێ ڤه، ده‌رباسی شنگالێ ببه.
ئارتێشا ئیراقێ جیهێ ڤێ گرووپا په‌كه‌كێ ب كامیرایێن ته‌عقیبێ ئه‌شكه‌ره كر و پشتره گوللـه به‌ردانێ.
چاڤكانیێن پێگه‌ها مه ئه‌شكه‌ره كرن، ئه‌ڤ گرووپا په‌كه‌كێ ژ هێلا كه‌سه‌كی ب ناڤێ «ئه‌حمه‌د مه‌لا» ڤه دهات برێڤه‌برن كو ئه‌ڤ كه‌س وه‌كه قاچاغچیێ مادده‌یێ هشبه‌رێ ژ بۆی په‌كه‌كێ د خه‌بته.
ئارتێشا ئیراقێ پاش كو گوللـه به‌ردانه ڤێ گرووپێ، ئه‌و ره‌ڤیان و چانتایا خوه یا مادده‌یێ هشبه‌رێ ل ور ب جیهـ هشتن، پشتره پاسه‌وانێن سینۆر چوونه جیهێ كو ته‌قه لێ هاتیه كرن و چانتایا مادده‌یێ هشبه‌رێ ل ور دیتن.
چاڤكانیێن پێگه‌ها «داركا مازی» ئه‌شكه‌ره كرن، پاسه‌وانێن سینۆر ده‌ست دانی یه سه‌ر وێ چانتایێ و ل گۆری وان مادده‌یه‌كێ ره‌نگ سپی تێ ده بوو و پاش كو پشكنین بۆ هاتیه كرن، ده‌ركه‌ت ئه‌و مادده جۆره‌كێ هشبه‌رێ یێ ب ناڤێ كرێستاله.
هێژای گۆتنێ یه، مادده‌یێ هشبه‌رێ وه‌كه چاڤكانیا سه‌ره‌كه یا داهاتا رێخستنا په‌كه‌كێ تێ حه‌ساب كرن، راپۆرێن سازیێن یه‌كێتیا ئه‌ورۆپایێ ته‌سبیت كریه كو په‌كه‌كه سالانه نێزی 3.5 ملیار دۆلاران ژ مادده‌یێ هشبه‌رێ ب ده‌ست تێخه.
