رێڤەبەریا خوەسەر یا ل رۆژئاڤایێ کوردستانێ رادگهینە، ئەو ئامادەکاریان ژ بۆ دادگەهکرنا هن ئەندامێن داعشێ یێن د گرتیگەهێن رێڤەبەریێ دە گرتینە، دکن.
بەردەڤکێ دەستەیا پێوەندیێن دەرڤە یا رێڤەبەریا خوەسەر کەمال عاکەف راگهاند، «دەستپێکێ، کەسێن کو گلی ل وان هاتنە کرن و دەستێن وان ب خوینا گەلێن هەرێمێ بوونە، دێ بێنە دادگەهکرن».
بەردەڤکێ دەستەیا پێوەندیێن دەرڤە یا رێڤەبەریا خوەسەر دیرۆکا دەستپێکرنا ڤان دادگەهان و رەگەزا کەسێن بێن دادگەهکرن دیار نەکر، وی تەنێ گۆت کو ئەو ئامادەکاریا وان دادگەهان دکن.
ل گۆری دانەیێن رێڤەبەریا خوەسەر، د گرتیگەهێن رێڤەبەریا خوەسەر دە 15 هەزار گرتیێن ب تاوانا تەرۆرێ یێن سووری و زێدەتر ژ 60 رەگەزێن دن هەنە کو پرانیا وان ئەندامێن بەرێ یێن داعشێ نە.
د مەها خزیرانا بۆری دە، هەڤسەرۆکێ ئەنجوومەنا دادمەدیا جڤاکی د رێڤەبەریا خوەسەر دە حەسەن ئەل-ئەحمەد گۆت کو مەکانیزمایا دادگەهکرنا ئەندامێن داعشێ د ناڤبەرا رێڤەبەری و هەڤپەیمانیا ناڤدەولەتی دە هین د جهێ گۆتوبێژان دە یە.
