سەرۆکێ ھەرێما کوردستانێ نێچیرڤان بارزانی د مەراسیما سالڤەگەرا کۆچا داوی یا جەلال تالەبانی دا راگھاند، ل گۆر قۆناغا نھا پێویستیا پارتیا دەمۆکراتا کوردستانێ (پەدەکێ) و یەکیتیا نشتیمانییا کوردستانێ (یەنەکێ) ب رێکەفتنەکا نوویا ستراتەژیک ھەیە.
نێچیرڤان بارزانی د مەراسیما سالڤەگەرا کۆچا داوییا مام جەلال تالەبانی دا گۆتارەک پێشکەش کر و بەحسا سەردەما دیتن و ناسکرنا مام جەلال کر و گۆت دەما کو سالا 1986ێ رێکەفتنا ئاشتیێ د ناڤبەرا مام جەلال و ئیدریس بارزانی دا ھات ئیمزاکرن وی مام جەل ناس کر و دیت کو ئەو ب ئاوایەکێ بەردەوام ژ بۆ ئاشتیێ ھەول ددە.
سەرۆکێ ھەرێما کوردستانێ دیار کر، ئیمزەکرنا رێکەفتنا ناڤبەرا سەرۆک مەسعوود بارزانی و جەلال تالەبانی ل واشنگتۆنێ، بوو سەدەما پێشکەتنا ھەرێما کوردستانێ.
نێچیرڤان بارزانی تەکەز کر کو ل گۆر قۆناغا نھا پێویستیا پەدەکێ و یەنەکێ ب رێکەفتنەکا نوو ھەیە و گۆت: “یەنەکە و پەدەکە وەک ھەردو ھێزێن سەرەکە ل ھەرێما کوردستان و ئیراقێ ئیرۆ ژی پێویستی ب رێکەفتنا ستراتەژیک ھەیە کو دکارە ببە سەدەما بھێزبوونا ھەرێما کوردستانێ. دڤێ ھەموو ئالیکاریێ بکن ژ بۆ بھێزکرنا ھەرێما کوردستانێ. دڤێ ئەم ژ بلی بھێزکرنا ھەلوەستا ھەرێما کوردستانێ ل چ پیڤانەکێ نەنێرن، ژ بەر کو ھێزا مە ھەموویان گرێدایی ھێز و ھەلوەستا ھەرێما کوردستانێیە.’
بارزانی ھەروھا ھێڤیا خوە ئانی زمان کو بیرئانینا مام جەلال ببە ھاندەر ژ بۆ یەکرێزیا ئالیێن کوردی و گۆت: “ئەز داخوازێ ل تەڤاھیا ئالیێن کوردی دکم لھەڤ بکن و ب ھەڤ را کار بکن.”
نێچیرڤان بارزانی دیرۆکا مام جەلال وەکە “بەشەکا گرینگا دیرۆکا نووژەنا تەڤگەرا رزگاریا کوردستانێ” ب ناڤ کر و گۆت، “ب نەمانا مام جەلال، ستوونەکا مەزنا لھەڤکرنێ وندا بوویە.”
دەربارێ پەیوەندیێن د ناڤبەرا جەلال تالەبانی و سەرۆک مەسعوود بارزانی دا ژی سەرۆکێ ھەرێما کوردستانێ گۆت: “مام جەلال ژ بۆ کو سەرۆک مەسعوود بارزانی دلخوەش بکە چ ژ دەستێ وی دھات دکر، کاک مەسعوود ژی چ داخوازەکا مام جەلال رەد نەکریە. سەرۆک مەسعوود بارزانی ستوویێ خوە نەخست بن فشارا سەرۆکێ ئامەریکایێ و ھەتا مام جەلال نەبوو سەرۆک، دەست ژێ بەرنەدا.”
