ئارتێشا ترکیێ و گرووپێن چەکداران گوندێن کۆبانێ، عەین عیسا و تل تەمرێ دان بەر تۆپان و د ئەنجامێ دا ھەژمارەک کەس بریندار بوونە.
رەوانگەھا سووری یا مافێن مرۆڤان بەلاڤ کر، ئارتێشا ترکیێ و گرووپێن چەکدارێن سەر ب وێ ڤە گوندێن کۆبانێ، عەین عیسا، تل تەمرێ ریا ناڤدەوەتی m4 دان بەر تۆپان.
ل گۆری زانیاریێن رەوانگەھێ، د ئەنجاما ڤان ئێریشان دا 4 وەلاتیێن سڤیل و 2 ئەندامێن ھێزا ئەرکا خوەپاراستنێ ل گوندەوارێ تل تەمر بریندار بوونە.
دا زانین ژی، ژ بەر گرانیا تۆپبارانا ل سەر گوندێن تل تەمرێ، ھەژمارەک مەزن ژ گوندیان مالێن خوە ب جھ ھیشتن و بەر ب جھێن ئارامتر کۆچبەر بوون.
رەوانگەھا مافێن مرۆڤان راگھاند ژی، ھەسەدێ ئۆتۆمۆبیلەکا لەشکەریا ئارتێشا ترکیێ ل گوندەوارێ گرێ سپی کریە ئارمانج و د ئەنجامێ دا کوشتی و بریندار ھەنە، لێ ترکیێ ھەتا نھا چ زانیاری دەربارێ ڤێ ئێریشێ دا بەلاڤ نەکرنە.
د دەما داوی دا، لگەل زێدەبوونا گەفێن ترکیێ یێن ژ بۆ دەستپێکرنا ئۆپەراسیۆنەکا لەشکەری ل رۆژئاڤایێ کوردستانێ و باکورێ سووریێ، ئێریشێن ترکیێ ل سەر رۆژئاڤایێ کوردستانێ و ھەرێمێن د بن کۆنترۆلا ھەسەدێ دا زێدە بوونە.
فەرماندارێ گشتییێ ھەسەدێ مەزلووم عەبدی ژی بەری چەند رۆژان دیار کر، ترکیێ ژ دەستپێکا ئیسال ڤە 59 جاران ئێریشی ھەرێمێ وان کریە و د ئەنجامێ دا ب دەھان کەسێن سڤیل بوونە قوربانی.
مەزلووم عەبدی بانگ ل وەلاتێن گەرانتۆرێن ناڤدەولەتی ژی کر، ھەلوەستا خوە ژ ڤان ئێریشان دیار بکن و سینۆرەکێ ژی ژ بۆ وان دەینن.
