ژنا كو ئیرۆ ل سلێمانیێ هاتیه كوشتن، به‌رپرسا په‌كه‌كێ بوو
ژنا كو ئیرۆ ل ناڤه‌ندا باژارێ سلێمانیێ، د ئێریشه‌كه چه‌كداری ده هاتیه كوشتن، یێك ژ ئه‌ندامێن ته‌ڤگه‌را ژنان یا رێخستنا په‌كه‌كێ بوو.
ئیرۆ رۆژا سێشه‌می 4/10/2022ێ ل تاخا بەختیاری یا سلێمانیێ، ئه‌نداما ته‌ڤگه‌را ژنان یا په‌كه‌كێ یا ب ناڤێ «ناگیھان ئاکارسەل» و كۆدناڤێ «زیلان» راستی ئێریشەکا چەکداری ھات و ب 4 گوللـه‌یان ژیانا خوه ژ ده‌ست دا.
تەرمێ ناگیھانێ ژ بۆی پزیشکیا داد یا سلێمانیێ ھاتیە برن و لێکۆلین دەربارێ ڤێ ئێریشێ دا ھاتیە دەست پێ کرن.
رێخستنا پەکەکێ ده‌ربارێ ئێریشێ جاره‌كه دن تۆهمه‌تێن بێئه‌خلاقانه ئاڤێتن و گۆت كو «تفاقا ئاكه‌پێ و مه‌هه‌پێ ب ئالیكاریا په‌ده‌كێ»، ئەنداما ناڤەندا لێکۆلینێ یا ژنولۆژیێ «ناگیھان ئاکارسەل» كوشتنه، ئه‌ڤ یێك ل ده‌مه‌كی یه، ته‌نێ د دو سالێن رابووری ده هه‌ری كێم 8 به‌رپرس و فه‌رماندارێن پایه‌بلند یێن رێخستنا په‌كه‌كێ ل سلێمانیێ هاتنه ته‌سفیه كرن.
هه‌ر ده‌ما په‌كه‌كه كادرۆیه‌كێ خوه ته‌سفیه دكه، زه‌مینه‌سازیێ ژ بۆی بوویه‌رێ چێدكه و سه‌ناریۆیێن موكم دادرێژه، پاش كو ته‌سفیه تێ ئه‌نجام دایین، ئه‌ول خالا سه‌ناریۆیا په‌كه‌كێ ئه‌ڤه: «تفاقا ئاكه‌پێ – مه‌هه‌پێ ب ئالیكاریا په‌ده‌كێ» ئه‌ڤ قه‌تل ئه‌نجام دایه، په‌كه‌كه رۆژێن ئه‌ول یێن سه‌ناریۆیێ ووسا ده‌رباس دكه.
لێبه‌لێ وه‌كه دیار سلێمانی ب «زۆنا كه‌سك» زۆنا یه‌نه‌كێ تێ حه‌ساب كرن واته یه‌نه‌كه تێ ده بالا ده‌سته، ب گۆتنه‌كه دن په‌ده‌كێ یێك پۆلیس ژی ل ڤی باژاری نینه، لوما ل ڤر دو ئێحتیمال هه‌نه:
یان په‌كه‌كێ ئه‌ڤ كادرۆیا خوه ته‌سفیه كریه و دخوازه پرۆباگندایێ بكه، و رۆژه‌ڤه‌كێ چێبكه.
یان ژی په‌كه‌كێ زیلان نه‌كوشتیه.
لوما هه‌گه‌ر په‌كه‌كێ ئه‌و نه‌كوشتیه، بلا ژ دۆستێن خوه یێن یه‌نه‌كێ بپرسه كانێ به‌رپرسا وان «زیلان» چما و چاوا د ناڤه‌ندا سلێمانیێ ده هاتیه كوشتن؟!.
زیلان كی یه؟
ل گۆری په‌كه‌كێ ژنا كو ل سلێمانیێ هاتیه كوشتن، «ئاكتیڤێست، ئه‌نداما ناڤه‌ندا له‌كۆلینێ یا ژنۆلۆژیێ، چالاكڤان و مه‌دیاكار و هه‌ر وها پارێزڤانا مافێن ژنێ» بوو، لێ دیار بوو كو ئه‌و به‌رپرسه‌كا ته‌ڤكه‌را ژنان یا په‌كه‌كێ بوو ب كۆد ناڤێ «زیلان».
ل گۆری ئاگاهیێن تایبه‌ت یێن پێگه‌ها «داركا مازی»، ناگیهان ئاكارسه‌ل ژ کوردێن کۆنیایێ یە، ل سالا 1999ێ تەڤلی په‌كه‌كێ ببوو، ل یەونانستانێ خوەند و پشترە بۆ تركیێ تێ شاندن.
ئاکارسەل ل سالا 2001ێ ژ بەر ئەندامه‌تیا په‌كه‌كێ هات گرتن و هه‌یا 2004ێ د زیندانێ ده مابوو، پشتره جاره‌كه دن تەڤلی چالاکیێن په‌كه‌كێ یێن ل تركیێ بوو، پشترە ئاکارسەل د کۆئۆردیناسیۆنا ترکیەیێ یا په‌كه‌كێ دە جهـ گرت.
پشتی پێڤاژۆیێن ل ترکیەیێ ئاکارسەل هات سلێمانیێ و ل ڤر دیسا تەڤلی چالاکیێن په‌كه‌كێ بوو، هەر چقاس وەکە کەسایەتەکی سڤیل دەردکەڤە پێش ژی، لێ ئه‌ڤ وێ راستیێ ناڤه‌شێره كو ئاکارسەل په‌كه‌كه‌یی یه.
ئاکارسەل کو نه به‌رپرسه‌كا سیاسی یا چالاکه، نایێ زانین چما هاتیە هەدەفگرتن، هه‌ر وها هەتا نها نایێ زانین کەسێن کو ئاکارسەل گوللـەباران کرین کی نە.
