پارتیا یه‌كێتیا نشتیمانیا كوردستانێ، ل رۆژێن داوی كه‌تیه ناڤا لڤ و ته‌ڤگه‌رێ ژ بۆی خورتكرنا پێوه‌ندیێن خوه ب رێخستن و گرووپێن شیعه یێن توندره‌و یێن ئیراقێ ره و هه‌ڤدیتن ب گرووپا عهسائب ئه‌هلولحه‌ق، ئه‌نجام دایه.
چاڤكانیێن پێگه‌ها «داركا مازی» ئه‌شكه‌ره كرن، كادرۆیێن یه‌نه‌كێ ل ناڤچه‌یێن كوردستانی یێن ده‌رڤه‌ی ئیداره‌یا هه‌رێما كوردستانێ، ده‌ست ب لڤ و ته‌ڤگه‌رێ ژبۆی خورتكرنا پێوه‌ندیێن پارتیا خوه ب گرووپێن شیعه یێن توندره‌و یێن ئیراقێ ره كرنه، ل پێشیا وان گرووپا عهسائب ئه‌هلولحه‌ق یا كو قه‌یس خه‌زعه‌لی رێبه‌راتیا وێ دكه.
چاڤكانیێن «داركا مازی» ده‌ستنیشان كر، كه‌سێ ب ناڤێ لیوا ده‌حام كو جێهگرێ مه‌لبه‌ندا 7 یا یه‌نه‌كێ یه ل مووسلێ، ل رۆژا 13 ئیلۆنا ئیسال 2022ێ ب هه‌ڤالێتیا به‌رپرسێن كۆمیته‌یێن یه‌نه‌كێ ل رۆژئاڤا مووسلێ سه‌ردانه‌ك برنه ئۆفیسا گرووپا عهسائب ئه‌هلولحه‌ق یا ل قه‌زایا تلعه‌فه‌رێ.
هه‌ر یێك ژ كه‌سێن ب ناڤێ «هانی قاسم ته‌قی» كو به‌رپرسێ كۆمیته‌یا یه‌نه‌كێ یه ل تله‌عفه‌رێ و «عومه‌ر عه‌لی خالد میرانی» به‌رپرسێ كۆمیته‌یا یه‌نه‌كێ یێ زوممارێ و هه‌ر وها به‌رپرسێ كۆمیتا پارتیێ یێ كۆمه‌لگه‌ها بردیه و هه‌ژماره‌كه كادرۆیێن یه‌نه‌كێ، ب لیوا ده‌حام ئیبراهیم قادر جێهگرێ به‌رپرسێ مه‌لبه‌ندێ یه‌نه‌كێ یێ مووسلێ ره، سه‌ردانا ئۆفیسا ئه‌هلولحه‌ق یا ل تله‌عفه‌رێ كرنه.
چاڤكانیێن پێگه‌ها «داركا مازی» كو دیمه‌نێن ڤێ جڤینێ ژی ب ده‌ست خستنه، ئه‌شكه‌ره كرن كو شاندا یه‌نه‌كێ نیقاشا خورتكرنا پێوه‌ندییان ب به‌رپرسێ ئۆفیسا تله‌عفه‌رێ یێ عهسائب ئه‌هلولحه‌ق كرنه.
هێژای گۆتنێ یه، ئۆفیسا میلیشیایا عهسائب ئه‌هلولحه‌ق یا قه‌زایا تله‌عفه‌رێ ئه‌ڤ سه‌ردانا شاندا یه‌نه‌كێ وه‌كه پۆست د گرووپا واتسئاپێ یا به‌رپرسێن ئۆفیسێن ڤێ میلیشیایێ ده پارڤه‌كر، لێ پشتره شێخ حه‌بیب دلێمی كو به‌رپرسێ ئۆفیسا میلیشیایێ یێ مووسلێ یه هێرس بوو و راسته‌راست ئه‌و پۆست ژ گرووپا واتسئاپێ ره‌شكر و تێ ده نڤیساند: ژ به‌ر سه‌ده‌مێن ئه‌وله‌هیێ ئه‌ڤ پۆست هات ره‌ش كرن.
