بارەگەهەکێ هێزێن ئه‌مه‌ریكی ل باژارۆکێ رمێلانا رۆژئاڤایێ کوردستانێ راستی ئێرشەکە ب مووشەکان هات.
فەرمانداریا ناڤەندی یا ئه‌مه‌ریكایێ د داخویانیەکێ راگهاند، شەڤا بۆری مووشەکەکە 107 مم ل دەرڤەیی بارەگەها لەشکەری یا رمێلانێ کەتیە، بێی کو زیانێن جانی و مادی بگه‌هنە ناڤەندێ و ئالاڤێن لەشکەری.
د داخویانیێ دە هات دەستنیشانکرن، ئێریش ژ ئالیەکی نەناس ڤە هاتیە کرن، ل جهێ ئاڤێتنا وێ مووشەکێ، مووشەکێن دن ژی هاتنە دیتن و فەرمانداریا ناڤەندی یا ئه‌مه‌ریكا ژی لێکۆلینێ ل سەر ئێریشێ دکە.
ئەڤ یەک پشتی وێ تێ، بەری دو رۆژان د ئێریشەکە ئاسمانی یا ئه‌مه‌ریكی ده ل سەر گوندەکێ د بن دەستێ ره‌ژیما سووریێ دە ل باکورێ رۆژهلاتێ سووریێ، ئەندامەکی داعشێ هات کوشتن. پشتی وێ ب چەند دەمژمێران ژی، د ئێریشەکە دن یا ئه‌مه‌ریكایێ دە، 2 ئەندامێن دن یێن رێخستنا تەرۆرێ هاتن کوشتن.
هێزێن ئه‌مه‌ریكی یەکەم جار د سەردەما کامپانیایا رێڤەبەریا ئۆبامای یا ل دژی داعشێ دە، ب هەڤکاری ل گەل هێزێن سووریەیا دەمۆکراتیک (هه‌سه‌دێ)، ل رۆژئاڤایێ کوردستانێ و سووریێ هاتن بجیهکرن. نها نێزیکی 900 لەشکەرێن ئه‌مه‌ریكی ل سووریێ بجیهـ بوونە.
واشنگتۆن هەر جار کۆمێن چەکدارێن کو ئیران پشتگریا وان دکە ب پێکانینا ئێریشێن ل سەر هێزێن ئه‌مه‌ریكی تاوانبار دکە.
