ل سەر تەرۆرکرنا غازی سالح ئالیخان 2 سال دەرباس بوون، کوژەر دیارن: رێڤەبەریا پەکەکێ

ل سەر تەرۆرکرنا غازی سالح ئالیخان 2 سال دەرباس بوون، کوژەر دیارن: رێڤەبەریا پەکەکێ

کوشتنا غازی سالح ئالیخان نە بوویەرەکە کو کریارێ وێ نە دیارە. بەرپرسیارێ تەرۆرکرنا غازی سالح ئالیخان دهێتە ناسین. غازی سالح ئالیخان ب فەرمانا رێڤەبەرێ پەکەکێ مراد قارایلان، ھاتە شەھید کرن. مراد قارایلان کوشتنا غازی سالح ئالیخان راستەراست پەژراند. یا راستی ئەڤ جینایەت ب فەرمانا قارایلان لێ ب بریارا سەرکردەیێن کەجەکێ یێن وەکە جەمیل بایک ڤە ژی ھات پەژراندن.

پلانسازیا فەرمانا کوشتنا کارایلان ژ ئالیێ فەرماندارێ مەتینا یێ وێ دەمێ «پلنگ سوروچ» ڤە ھاتیە دانان.

کوژەر  «پلنگ جزیری و جەسوور رۆبۆسکی» بوون.

یێن کو دیرۆکا پەکەکێ یا راستین نزانن نەشێن بزانن کێ گولـلە ل غازی سالح ئالیخان رەشاندنە.

ھندەک کوردستانیێن باشوور کو روویێ راستینێ دیرۆکا پەکەکێ ناس نەدکرن، نەدخواستن باوەر بکن کو غازی سالح ئالیخان ژ ئالیێ پەکەکێ ڤە ھاتیە تەرۆرکرن. ژ بەر کو غازی سالح ئالیخان نە سیخور بوو، نە کارێ ترکان دکر، نە زیان دا بوو گەریلایان، نە ژی موداخەلەیی کەسی کر بوو، د 47 سالیا خوە دا 33 سالان پێشمەرگاتی کر بوو. کەسێن کو پەکەکە ناس نەدکرن، دگۆتن ما چما دێ پەکەکە غازی سالح ئالیخان کوژیت.

یێن کو پەکەکێ ژ ئەکرانێن ستێرک تیڤی و رۆناھی تیڤی ناس دکن، دفکرن کو ژیانا د ناڤ پەکەکێ دا مینا راستییا ئەکرانێن تەلەڤیزیۆنێ یە. لێ بەلێ پەکەکەیا د مەدیایێ دا چ پەیوەندی ب راستییا پەکەکێ ڤە نینە. کادرۆیێن پەکەکێ یێن د کلیپان دا پۆرێ خوە شەدکن لگەل پەز کۆڤییان دا دبەزن و گۆڤەندێ دگێرینن پەکەکە وان وەکە بکوژ بکارتینە.

کادرۆیێن د وان کلیپان دا دکەنن و ل سەر فەیسبۆکێ پارڤە دکن، پاشێ دچن ل بەر چاڤێ زارۆکێ پێنج سالی بابێ وان دکوژن. غازی سالح ئالیخان ل بەر چاڤێ کورێ وی یێ 19 سالی و چار کەچێن وی یێن ھەری بچووک 5 سالی ھێلین، سۆلین، لۆرین و سەرین ھات تەرۆر کرن. پەکەکە زارۆکێن کوردان یێن کو بەرێ خوە ددن کوردستانێ دکە قاتلێن کوردان. ل بەر چاڤێن زارۆکێن وان کوردان دکوژە. وەکە کو  ترکیا، ئیران، سووریا و سەددام ل کوردان دکر.

دڤێت ئێدی ئەڤ روویێ پەکەکێ بهێت دیتن

پەکەکە تەڤگەرەکە کو ژ بۆ ساخ مانا خوە، چ ژ دەستێ وان تێ، بێ دودلی دکە و چ پرەنسیب و رەگەزێن ھەڤچەرخ نینە. پەکەکێ ژ بۆ ھەبوونا خوە قەت دودلی نەکریە کو کادرۆیێن خوە ژی بکوژە.

ژ حەقی قەرار حەتا نھا زنجیرا جینایەتان

دیرۆکا پەکەکێ دیرۆکا کوشتن و قرکرنێ یە. عەڤدلا ئۆجەلان بێی دودلی ھەڤالێ خوەیێ ھەری باش و یەک ژ دامەزرینەرێن یەکەم یێن پەکەکێ حەقی قەرار ژ بەر رەخنەگەرتنێ دا کوشتن. لێ وەک ھەر جارێ پەکەکێ ئەو کوشتن ڤەشارت و گۆت، سیخورێن دەولەتا ترک ئەو کوشتییە.

پەکەکە چ جینایەتێن کو کری قەبوول ناکە، ژ بۆ ھەر یەکێ سەناریۆیەکێ دنڤیسە. دەما کو غازی سالح ئالیخان ھاتیە کوشتن، دەستپێکێ پەکەکە بێدەنگ ما و پشترا گۆت کو مە ئەو نەکوشتییە. لێ بنڤە بنڤە بەلاڤ کر کو دەولەتا ترک ئەو کوشتیە. لێ بەلێ مالبات و ھەڤالێن وی دیار کرن کو ئەو ژ ئالیێ پەکەکێ ڤە ھاتییە تەرۆرکرن.

لێ دەما کو فەرماندارێ پەکەکێ ئۆزگوور ژییاندا یێ کو ژ ھەپەگێ، شاخێ لەشکەری یێ پەکەکێ ڤەقەتیابوو ئاخڤتی، راستیا ھەری گرینگ دەرکەت ھۆلێ. گەر ئەو نەهاتبا و راستی نەگۆتبا ژی  کەسێن کو دیرۆکا پەکەکێ دزانن دکارین فێم بکن کو غازی ژ ئالیێ پەکەکێ ڤە ھاتیە شەھید کرن. ژ بەر کو دیرۆکا پەکەکێ تژییە ژ جینایەتێن کوشتنا کەسێن مینا غازی سالح ئالیخان.

رەوشەنبیرێن کورد ل دژی ڤێ جینایەتا درندە بێدەنگ مان

رەوشەنبیرێن کوردستانی ل ھەمبەر تەرۆرکرنا غازی سالح ئالیخان کارڤەدانا دھاتە خواستن نیشان نەدا. ب تایبەتی رەوشەنبیرێن باشوورێ کوردستانێ و ناڤدارێن ھەرێمێ ل ھەمبەری بوویەرێ بێدەنگ مان. شیرەتا مە ل ڤان کەسان ئەوە کو جارەکا دن ل دیرۆکا پەکەکێ بنێرن. تو چقاس بێدەنگ بمینی، پەکەکە ئەوقاس ئێریشکار و تووندرەو دبە. ژ بۆ ڤێ ژی ژ بۆ بیرئانینا غازی بهێت پاراستن و ھەر کەس دۆزا پاشەرۆژێ مسۆگەر بکە، دڤێت ئەڤ کوشتن و کریارێن دن یێن بێپەروایێن پەکەکێ بێن ئاشکەراکرن.

دەما غازی ھات کوشتن کەچا وی یا بچووک سەرین 5 سالی بوو. سەرین نھا 8 سالییە. دچە دبستانێ. لێ بیریا ملێ بابێ خوە دکە. ژ بیر ناکە کو بابێ وێ ل بەر چاڤێن وێ چاوا کەت ئەردێ. کوژەرێن کو بوونە سەدەما ڤێ ئێشا سەرینێ دیارن. کوژەر رێڤەبەریا پەکەکێ یە. ناڤێن وەک قارایلان و بایک ئەڤ جینایەتە پەژراندن، بریار ل سەر دا و ب زارۆکێن کوردان ژی دا ئەنجامدان. پەکەکە چاڤکانیا تەرۆرا ناڤخۆیی یە.

پوستێن ھەمان بەش