ل زندانا «لاکان» یا ل باژارێ رەشت یێ ل پارێزگەھا گەیلانا ل باکورێ ئیرانێ ژ بەر دەرکەتنا ئالۆزیێ، ھەژمارەک زندانی ھاتن کوشتن و ھەژمارەک ژی بریندار بوون.
نێزیکی چار ھەفتە نە، ل ھەژمارەک ناڤچەیێن ئیرانێ بەشەک ژ وەلاتیێن نەرازی، خوەپێشاندانێ دکن.
خوەدپێشاندانان پشتی جانژدەستدانا مەھسا (ژینا) ئەمینی سەری ھلدان.
ئیرانێ راگھاندیە کو مەھسا ئەمینی ب جەلتەیا دل کۆچا داوی کریە، کەسێن ل دژی دەستھلاتا ئیرانێ ژی دبێژن کو وێ د بن ئێشکەنجەیێ دا جانێ خوە ژ دەست دایە.
دۆزگەرێ گشتی یێ باژارێ رەشت مەھدی فەلاح میری راگھاند، کەسێن کو جەزایێ دارڤەکرنێ ل وان ھاتیە برین، د ناڤ زندانێ دا ئالۆزی دەرخستنە.
ئاژانسا ئیرنا یا فەرمی بەلاڤ کریە، ھێزێن ئەولەھیێ ب رێیا بکارئانینا گازا رۆندکرێژ، کارینە رەوشێ ئارام بکن.
ھەروھا ئەشکەرە کریە، چەند زندانیان جانێ خوە ژ دەست دانە و ھەژمارەک زندانی ژی بریندار بوونە، بەشەک ژ وان ژی دەربارێ وان دە لێپرسین تێ کرن.
