د 27ێ ئیلۆنێ دا چەکدارێن پەکەکێ ل مێرسینێ ئێرشی پۆلیسان کر. د بوویەرێ دا پۆلیسەک و دو چەکدارێن پەکەکێ جانێ خوە ژ دەست دان. ھەڤسەرۆکێ بەرێ یێ ھەدەپێ سەلاحەدین دەمیرتاش و ھەدەپێ بوویەر شەرمەزار کرن. رایەدارێن پەکەکێ ژی بێیی کو ئاماژە ب ناڤێ دەمیرتاش و ھەدەپێ بدەن ئەو شەرمەزار کرن.
مافناس و شرۆڤەکارێن سیاسی یێن باکورێ کوردستانێ داخویانی و بەرتەکێن پشتی بوویەرا مێرسینێ نرخاندن و گۆتن کو؛ داخوازا دەمۆکراسی و شەرێ چەکداری ب ھەڤ را نابە و دڤێت پشتگریا ھەولێن دەمۆکراتیک بێن کرن.
کارڤەدانێن رەخنەیێن ھەڤسەرۆکێ بەرێ یێ ھەدەپێ سەلاحەدین دەمیرتاش و ھەدەپێ یێن دەربارێ بوویەرا 27ێ ئیلۆنێ یا مێرسینێ دا بەردەوام دکن. رێڤەبەرێن پەکەکێ بەرتەک نیشانی وان کەس و ئالیێن کو بوویەرا مێرسینێ شەرمەزار کرنە، دان. ل گۆری مافناسێن کورد ژ بۆ چارەسەرکرنا پرسگرێکا کورد ل باکورێ کوردستانێ و ترکیایێ دڤێت پشتگریا رێ و رێبازێن سیاسی بێ کرن.
سەرۆکێ بەرێ یێ بارۆیا دیاربەکرێ موستافا ئۆزەر ژ بۆ K24ێ دیار کر: “من ژی سەردانا سەلاحەدین دەمیرتاش کریە. ئەو دبێژە؛ ھەگەر ئەم دێ مەسەلەیا کوردان ب دەمۆکراسی و دادوەریێ چارەسەر بکن دڤێت گێریلا پیچەکێ ژ مە دوور بکەڤە. ئانگۆ دەمیرتاش دبێژە؛ تێکلی تشتێ کو ئەم دمەشینن نەبن. دەمیرتاش دبێژە؛ بلا ئەو ل مەسەلەیا خوە بنێرن ئەم ژی دێ ل ڤر تێکۆشینا دەمۆکراسیێ بکن.”
بەرتەکێن دەمیرتاش د ناڤا رایا گشتی یا باکور و ترکیا و مەدیایا جڤاکی دا جھەکێ بەرفرەھ گرت . گەلەک کەسان پشتگریا پەیامێن دەمیرتاش کرن. مافناس و شرۆڤەکارێن سیاسی یێن کورد گۆتن کو؛ دەمەکێ درێژ ھێزێن چەکدار ھەول دان کو ل گۆری رێ و رێبازێن خوە پرسگرێکا کورد چارەسەر بکن، لێ بەلێ سەر نەکەتن و د ڤێ دەمێ دا ب ھێز و تووندیێ چ پرسگرێک نایێن چارەسەرکرن.
مافناس و شیرۆڤەکارێ سیاسی «سینان تانرکولو» ژ بۆ K24ێ راگھاند: “پرانیا گەلێ کورد دبێژە؛ دڤێت ئێدی مەسەلەیا کورد نە ب چەک و توندیێ، ئەو ب ئاشتی و رێبازێن دەمۆکراسیێ بێ چارەسەرکرن. ئاشتی ژی ب چەکداری نابە. ئاشتی، ب دەمۆکراسی، دیپلۆماسی و رێیا بێتوندی و بێچەک دبە.”
ل گۆری نرخاندنا مافناس و شیرۆڤەکارێن سیاسی، ژ بۆ بدەستخستنا مافێن خوە یێن رەوا دڤێت کورد ل دەرڤەیێ توندیێ تێکۆشینا خوە ب رێ و رێبازێن سیاسی و دەمۆکراتیک برێڤە ببن. مافناس و شیرۆڤەکار دبێژن؛ پرانیا کوردێن باکور و ترکیا پشتگریا رێبازێن دەمۆکراتیک دکن.
