ل عه‌فرینێ ژ دوهی ڤە شەر و پەڤچوونێن گران د ناڤبەرا گرووپێن چەکدارێن سەر ب ئارتێشا ترکیێ ڤە دەرکەتیە و ل گۆری ژێدەرێن مەدیایی هەیئەت تەحریر ئەل شامێ (نوسرا) ژی دەرباسی گوندێن ناڤچەیا شێرەوا یا عه‌فرینێ بوو.
ژ دوهی ڤە شەر و پەڤچوونێن گران د ناڤبەرا گرووپا جه‌بهه‌ت ئەل شامیێ ژ ئالیەکی و فرقەیا حەمزات و سلێمان شاهـ (ئەمشات) دە ل گوندێن ناڤچەیێن شێرەوا، مابەتا، جندرێس و شیێ دەرکەتنە، چەکدارەکی جەبهەت ئەل شامیێ ل گوندێ کەوکەبێ هات کوشتن و 3 چەکدارێن دن ژی بریندار بوون، هەر وها ریا سەرەکە یا عه‌فرین – جندرێسێ ژ بەر شەر هاتیە قوتکرن.
ل گۆری ژێدەران ژی، جەبهەت ئەل شامیە د ئەنجاما شەر و پەڤچوونێ دە 5 گوند (فرێریێ، کەفەر زیتێ، تەل حەمۆ، تلف و کەوکەبێ) یێن د ناڤبەرا عه‌فرین و جندرێسێ دە کۆنترۆل کرن، چەکدارێن سلێمان شاهـ (ئەمشار) یێن کو پشتگریا حەمزات دکن ژی، گوندێ ئەرەندە و مستکا یێن ل ناڤچەیا شیێ کۆنترۆل کرن.
هات زانین ژی، کاروانکە لەشکەری یێن مەزن یا فرقەیا «سێیەمین» ژ بۆ پشتەڤانیا جەبهەت ئەل شامیێ ژ باژارێ ئەعزازێ بەر ب عه‌فرینێ ڤە ب رێ کەت و هەر وها هێزەکە لەشکەری گهشتە دەردۆرا ناحیا مابەتا و تا کو گوندێ ئەرەندە و مستکا یێن کو ژ ئالیێ فرقەیا «سلێمان شاهـ» ڤە هاتیە کۆنترۆلکرن، ڤەگەرینن.
ل گۆری زانیاریان ژی هەیئەت تەحریر ئەل-شام (جەبهەت ئەل-نوسرا بەرێ) هێزێن خوە یێن لەشکەری ل دەردۆرا عه‌فرینێ ل نێزیکی رێبەندا خەزاویێ ل باشوورێ عه‌فرینێ کۆم دکە و بەشەک ژ هێزێن وێ دەرباسی گوندێ باسووتا و عەین دارا یێن گوندەوارێن عه‌فرینێ بوون.
ژ بەر شەر و پەڤچوونێن د ناڤبەرا گرووپێن چەکداران دە، رەوشا ئەولەهیێ ب تەمامی تێک چوویە و ترسەکە مەزن د ناڤا خەلکێ عه‌فرینێ دە دەرکەتیە.
ئەڤ شەر و پێشهات پشتی وێ یەکێ ل عه‌فرینێ هاتن، دو رۆژن شەر و پەڤچوون د ناڤبەرا وان گرووپێن سەر ب ترکیێ ڤە ل باژارێ باب و جەرابولوس دقەومن و چەکدارێن جەبهەت ئەل شامیە و فەیلەقا سێیەمین ل بابێ و جەرابلوسێ کاری یە دەست دەینە سەر هەژمارەک مەزن ژ بارەگەهێن هەمزات.
