گرتیگەھا دیاربەکرێ کو پشتی دەربەیا لەشکەری یا 1980یێ تێ دا ئێشکەنجەیێن گران ل کوردان ھاتبوو کرن، بەریا سەردانا سەرۆک کۆمارێ ترکیێ رەجەب تەییب ئەردۆگان د ناڤا رۆژەکێ دا ھات ڤالاکرن.
سەرۆک کۆمارێ ترکیێ رەجەب تەییب ئەردۆگان د 9ێ تیرمەھا 2021ێ دا د سەردانا خوەیا دیاربەکرێ دا گۆتبوو کو ئەو دێ گرتیگەھا دیاربەکرێ بگرن و وێ دەرێ بکن موزەخانە و ناڤەندەکا چاندی.
رەجەب تەییب ئەردۆگان ل بەر ئاڤاھیا پارێزگاریا دیاربەکرێ دەربارێ گرتیگەھا تیپا E یا دیاربەکرێ دا گۆتبوو: “ئیرۆ ئەز دخوازم مزگینیەکا خوەش بدم وە. ئەم گرتیگەھا دیاربەکرێ یا کو ناڤێ وێ ب زلم، ئێشکەنجە و پێکانینێن دژی مرۆڤی ڤە گرێدایییە، ڤالا دکن و وەکە ناڤەندەکا چاندێ پێشکێشی وە دکن. وەزارەتا مەیا دادێ د ڤی واری دا ئامادەکاریێن پێویست دکە. ب ڤی ئاوایی ئەم بیرەوەریا خەرابا دیاربەکرێ ژ ھۆلێ رادکن.”
ئەردۆگان رۆژا شەمبیێ 15ێ جۆتمەھێ دێ سەردانا دیاربەکرێ کەت و بەریا سەردانا وی، د ناڤا رۆژەکێ دا 270 گرتی و 170 خەباتکارێن ل گرتیگەھا دیاربەکرێ، بۆ گرتیگەھا دن یا باژێری ھاتن ڤەگوھاستن.
گرتیگەھا دیاربەکر د ناڤا 10 گرتیگەھێن ھەری ھۆڤ و ھەری خرابێن جیھانێ دا جھ دگرە کو ل سەر دیوارێ هاتبوو نڤیساندن: “ب ترکی باخڤە گەلەک باخڤە.” ژ بەر ڤێ داییک دەما سەردانا زارۆکێن خوە دکرن ژ بەر کو ب ترکی نەدزانین تەنێ ل چاڤێن زارۆکێن خوە دنێرین.
