ل عەفرینێ شەر و پەڤچوون د ناڤبەرا گرووپێن چەکدار یێن سەر ب ترکیێ ڤە بەردەوامە و «ھەیئەت تەحریر ئەل-شام» (نوسرە) دەرباسی ناحیا جندرێسێ و ھەژمارەک گوندێ شێرەوا بوو و 3 وەلاتیێن سڤیل و 10 چەکدار ھاتن کوشتن.
ژ پێر 11ێ جۆتمەھێ ڤە شەر و پەڤچوونێن گران د ناڤبەرا گرووپا جەبهە ئەل شام ژ ئالیەکی و فرقەیا ھەمزات و سلێمان شاھ (ئەمشات) دا ل گوندێن ناڤچەیێن شێرەوا، مابەتا، جندرێس و شیێ دەرکەتنە.
ل گۆر زانیاریان، ھەیئەت تەحریر ئەل-شام (جەبھەت ئەل-نوسرەیا بەرێ) دەرباسی باژارۆکێ جندرێسێ و ھەژمارەک گوندێن ناڤچەیا شێرەوا بوو و کۆنترۆل کر.
ژ ئەنجاما شەر و پەڤچوون دا، ژنەک ب ناڤێ حەنیفا نووری ل گوندێ کورزێلێ، ژنەک ب ناڤێ فاتیمە عەبدۆ ل گوندێ عەین دارا و زارۆکەکی 3 سالی ل کامپا کووەیت رەحمێ یا ل نێزیکێ گوندێ قیبارێ ھاتن کوشتن و نێزیکی 10 کەسان ژی بریندار بوون.
ژ ئالیێ خوە ڤە ژی رەوانگەھا سووری یا مافێن مرۆڤان بەلاڤ کر، د ئەنجاما شەر و پەڤچوونان دا، ھەری کێم 10 چەکدار ھاتنە کوشتن.
ژ بەر شەر و پەڤچوونێن د ناڤبەرا گرووپێن چەکداران دا، خەتا سەرەکە یا ئەلەکتریکێ تێک چوو و ئەلەکتریک ل سەر باژارێ عەفرین و جندرێسێ قوت بوو و ئاگر ب دارستانێن ناڤچەیا مابەتا کەت.
ھەر وھا رەوشا ئەولەھیێ ب تەمامی تێک چوویە، ترسەکا مەزن د ناڤا خەلکێ عەفرینێ دا دەرکەتیە و د مالێن خوە دا مانە.
ئەڤ شەر و پێشھات پشتی وێ یەکێ ل عەفرینێ تێن، رۆژا ئینا بۆری چالاکڤان محەمەد عەبدولەتیف، کو ب ناڤێ “ئەبوو خەنووم” تێ ناسین ل باژارێ بابێ ژ ئالیێ گرووپا ھەمزات ڤە ھاتبوو کوشتن، ڤێ یەکێ ژی کارڤەدان و نەرازیبوونا خەلکێ ل پشت خوە ئانی و پشترا د ناڤبەرا گرووپێن چەکدار دا شەر و پەڤچوون ل باب و جەرابلوسێ دەرکەتن و گھیشت عەفرین.
