کورد داخواز دکەن کورسیێ ئیرانێ ل نەتەوەیێن یەکبوویی ژێ بهێتە ستاندن

کورد داخوازا دکەن کورسیێ ئیرانێ ل نەتەوەیێن یەکبوویی ژێ بهێتە ستاندن

کۆلانێن رۆژھلاتێ کوردستانێ و ئیرانێ زەخت ل رەژیما تەھرانێ کریە و سەرھلدانا گەلێ رۆژھلاتێ کوردستانێ و ئیرانێ د ھەفتەیا پێنجان دا دژوار دبە و سەرۆکێ بەرێ یێ ئامەریکا «باراک ئۆباما» خەمساریا وەلاتێ خوە د پشتگریکرنا خوەپێشاندانێن گەلێ ئیرانێ دە ب شاشتی ب ناڤ دکە و د ھەمان دەمێ دا جۆ بایدن دبێژە، ئاگرێ شۆرەشا کو ژ ئیرانێ رابوویە ئەز ھەژاندم، باوەر ناکم ئەڤ ئاگر ئەوقاس زوو ڤەمرە.

شەڤا ئینێ 14/10/2022ێ خوەپێشاندانێن گەل ل رۆژهلاتێ کوردستانێ و ئیرانێ دژی رەژیما ئیسلامی یا ئیرانێ بەردەوام بوون و پشتەڤانیا ناڤدەولەتی ژ گەلێ ئیرانێ بەر ب زێدەبوونێ دچە. کۆما “جوانێن تاخێن تەھرانێ” و “مەجلسا تاخێن بۆکانێ” و “تەڤگەرا جوانێن شۆرەشگەرێن سەقزێ” و پرانیا مەجلس، کۆم و رێخستنێن خوەبەخشێن باژاران ب پارڤەکرنا داخویانیان و ئاگاهداریان داخواز ژ خەلکێ کرنە ئیرۆ (شەمبیێ 15/1/2022) ل دەمژمێر 12:00ێ ل کۆلانان کۆم ببن.

شەڤا ئینێ ل سنە، بۆکان، سەقز، مەشھەد، شیراز، یەزد، تەھران و پرانیا باژارێن مەزن و بچووکێن رۆژھلاتێ کوردستانێ و ئیرانێ ب گرتنا جادە، رێ و بازار، شەوتاندنا لاستیکێن ترۆمبێلان و کۆمبوونا ل سەر جادەیان و ئاڤێتنا سلۆگانێن دژی کۆمارا ئیسلامی د ناڤا مالان دا، خوەپێشاندانێن ل دژی کۆمارا ئیسلامی بەردەوام بوون.

پشتی کو ل خۆزستانێ بانگەوازا ل هەڤ کۆم بوونا گەل هات پارڤەکرن ئینتەرنەت ل ڤی باژارێ هات قوت کرن.

کۆما “جوانێن تاخێن تەھرانێ” ب پارڤەکرنا داخویانیا خوە یا ژمارە 10 بانگ ل خەلکێ تەھرانێ کر کو ئیرۆ دەمژمێر 12:00 پشتی نیڤرۆ ل مەیدان و کۆلانان کۆم ببن و ئەڤ کار ب مەزنترین فیلتەرشکێن ب ناڤ کریە کو حکوومەتێ ھەموو تۆرێن جڤاکی فیلترە کرنە.

د وارێ ناڤنەتەوەیی دا، سەرۆکێ بەرێ یێ ئامەریکایێ «باراک ئۆباما» د ھەڤپەیڤینەکێ دا گۆت کو رێڤەبەریا وی د سالا 2009ێ دا خەلەتیەک کر کو پشتگری نەدا شۆرەشا کەسکا ئیران، و دبێژە ژی، “ل کو دەرێ ئەم چرووسکەک ژ ھێڤیا گەل ژ بۆ ئازادیێ ببینن، دڤێ ئەم پشتگریێ بدنێ.”

سەرۆکێ ئامەریکا یێ نها ژی جۆ بایدن رۆژا ئینێ ل زانینگەھەکا کالیفۆرنیایێ گۆت: “ئەز ب سالانە کو د قادا سیاسەتا دەرڤە دا مە. ئەز ژ ئاگرێ شۆرەشا ل ئیرانێ رابوویە ماتمایی مامە. ئەز باوەر ناکم کو ئەڤ ئاگر ئەوقاس زوو ڤەمرە.”

رۆژنامەیا «لە مۆندە» یا فرانسی ژ زارێ رێخستنێن مافێن مرۆڤان راگهاند کو ھەتا نھا 185 کەس ژ وان نێزیکی 40 کورد ژ ئالیێ چەکدارێن ئیرانێ ڤە ھاتنە کوشتن.

رۆژنامەیا «لە مۆندە» نڤیساندیە: “گەلەک شاھد دبێژن کو لەشکەر ب هەرەمەکی گولـلەیان ل مرۆڤان دبارینن. زلامەکی ژ سنەیێ کو ل پشت ئۆتۆمۆبیلا خوە روونشتبوو، تەنێ ژ بەر کو د پرۆتەستۆیێ دە وەکە دیارکرنا نەرازیبوونا خوە بۆق لێدایە، ب کالاشنیکۆڤێ ھات گولـلەبارانکرن و د جھ دا مر.” پرانیا وان کەسێن هاتنە کوشتن خوە کەڤرەک د دەستێ وان دا تونە بوو کو خوە پێ بپارێزن، چ کەسەکی ئاگاهیێن زەلال ل سەر هەژمارا بریندارێن باژارێن کوردان تونەیە، ژ بەر کو ژ ترسا گرتنێ دترسن کو بچن نەخوەشخانەیان.”

د بەشەکە دن یا راپۆرتا «لە مۆندە» دا هاتیە: “ئاستا زۆرداریێ ل باژارێ سنە مەترسیدارە. چالاکڤانێن مافێن مرۆڤان یێن کوردستانێ بەحسا تونەلا ترسێ دکن، واتە گرتی د ناڤبەرا دو رێزێن زۆردەستان دا تێنە شاندن و ژ ھەر دو ئالیان ڤە تێنە لێدان و ئیشکەنجەکرن.”

د درێژاهیا راپۆرتا «لە مۆندە» دا هاتیە: “رەژیما تەھرانێ نە تەنێ بەرپرسیارەتیا خوە ل ھەمبەر مافێن خوەپێشاندەران نیشان نادە، بەلکو ڤێ یەکێ ب دژمنێن دەرڤە ڤە گرێ ددە و یا ھەری گرینگ ژی ب ئۆپۆزسیۆنا کوردێن ئیرانێ یا ل باشوورێ کوردستانێ ڤە گرێ ددە، ژ بەر کو ڤان پارتیان دیرۆکەک بەرچاڤ ژ خەباتا ل دژی دەستهلاتا تەهرانێ ژ خوە نیشان دایە.”

د راپۆرتا «لە مۆندە» دا ئێماژە ب نەرازیبوونا کارکەران هاتیە کرن و د ڤێ دەربارێ دا دبێژە: “ژ رۆژا شەمبیێ (8/10/2020) ڤە ل ئیرانێ ل گەلەک کارگەھێن جوربجور رێزە گرەڤێن کارکەران دەست پێ کرنە، کو ژ بۆ ڤێ رەوشێ پر گرینگە. ژ بەر کو ئەڤ چالاکی دکارن ببن پشتگریەک باش ژ بۆ خوەپێشاندانێن سڤیل و سیاسی. ل ئیرانێ گرەڤێن گشتی فاکتۆرەکە گرینگە، هەر وەک چاوا کو د شۆرەشا 1979ێ دا ھلوەشینا پادیشاھیێ پێک ھات.”

کورد داخواز دکەن کورسیێ ئیرانێ ل نەتەوەیێن یەکبوویی ژێ بهێتە ستاندن

ناڤەندا ھەڤکاریا پارتیێن رۆژھلاتێ کوردستانێ ل سەر نامەیا نوونەرێ هەمیشەیی یێ ئیرانێ ل نەتەوەیێن یەکبوویی داخویانیەک دا و گۆت: “ئەم سەرەرایی رەدکرنا ڤان داخویانیێن بێ بنگەھ و پووچێن نوونەرێ رەژیما ئیرانێ رادگهینن: چ ئێریشا مووشەکی بۆ سەر بارەگەهێن مە و چ بنپێکرنا ئاشکەرا یا سەروەریا ئاخا عیراقێ و هەرێما کوردستانێ، ژ درێژاهیا سیاسەتا تێکدەرانە و ئاژاوەگێری یا کۆمارا ئیسلامی ل رۆژهلاتا ناڤینە. رەژیما ئیرانێ ل همبەر سەرهلدانا گرسەیی مات مایی مایە، رەژیما ئیرانێ ھەول ددە کو بالێ ل سەر کوشتن و تەپەسەرکرنا وەحشیانە یا خەلکێ ل باژارێن ئیرانێ دوور بخە.”

د درێژاهیا داخیانیا ناڤەندا هەڤکاریا پارتیێن رۆژهلاتێ کوردستانێ دا هاتیە: “داخوازا مە ژ جڤاتا ئەولەکاری و سەکرەتەرێ گشتی یێ نەتەوێن یەکگرتی ئەوە کو ب ئاوایەکی جدی پشتگرییا داخوازێن گەلێن ئیران و کورد و درووشمێن ژن، ژیان و ئازادی بکن و ژ بلی شەرمەزارکرنا ڤێ رەژیما تەرۆریست، کورسیێ ئیرانێ ل نەتەوێن یەکگرتی پاشدە ڤەگەرینن و نوونەرێ نھا یێ ئیرانێ کو ئەندامێ رێخستنا تەرۆریستا سپاھێ پاسدارا یە، دەرخینن.”

یەکیتییا ئەوروپا: پێویستە رەژیما ئیرانێ ب زووترین دەم دەست ژ تەپەسەرکرنا خوەپێشاندەران بەردە

ژ ئالیێ دن ڤە دوهـ رۆژا ئەینی 14/10/2022، جۆزێف بۆرێل، بەرپرسێ سیاسەتا دەرڤە یا یەکیتیا ئەورۆپایێ، ل سەر تویتەرێ راگھاند کو ئەو لگەل وەزیرێ دەرڤەیێ ئیرانێ «حوسێن ئەمیر عەبدوڵاھیان» دا ئاخڤیە و داخواز کریە کو د زووترین دەم دا هێزێن ئیرانێ دەست ژ تەپەسەرکەرنا خوەپێشاندەران بەردن و گۆت: یەکیتیا ئەورۆپایێ پشتەڤانیا شۆرەشا گشتی یا گەلێن ئیرانێ دکە و پیدڤییە مافێن وان یێن بنگەھین بێن دایین، و پیدڤییە کۆمارا ئیسلامی مافێن بنگەھین یێن گەل ناس بکە.”

سەرھلدانا گەلێ رۆژھلاتێ کوردستانێ و ئیرانێ دەرباسی ھەفتەیا خوەیا پێنجان بوو کو ب دەربرینا نەرازیبوونا ل دژی کوشتنا ھۆڤانە یا کەچا کوردا 22 سالی «ژینا ئەمینی» یا ژ باژارێ سەقزێ یێ رۆژھلاتێ کوردستانێ دەست پێ کربوو کو ژ ئالیێ ھێزێن چەکدارێن ئیرانێ ڤە ل تەھرانێ ھاتبوو ئیشکەنجەکرن. رێخستنا لێبۆرینا ناڤدەولەتی (ئەمنستی ئینتەرنەشنال) رۆژا پێنجشەمبێ 13/10/2022 راپۆرتەک دەربارێ کوشتنا خوەپێشاندەران ل رۆژھلاتێ کوردستانێ و ئیرانێ بەلاڤ کر، ل گۆری راپۆرتێ، ھەری کێم 23 زارۆک ژ ئالیێ ھێزێن چەکدارێن ئیرانێ ڤە ب تەقەیا راستەراست ھاتنە کوشتن.

پوستێن ھەمان بەش