ئیرۆ پێنجەمین سالڤەگەرا خیانەت و تاوانا 16ێ جۆتمەھا 2017ێ یە، کو جارەکا دن کەرکووک و ناڤچەیێن کوردستانی یێن دەرڤەیی ئیدارەیا ھەرێما کوردستانێ ژ ئالیێ چەکدارێن حەشدا شەعبی ڤە ھاتن داگیرکرن و حکوومەتا ئیراقێ ھەموو نرخێن یاسایی، دەستووری و مرۆڤی بنپێ کرن.
رۆژا 16ێ جۆتمەھا 2017ێ، ھێزێن ئیراقی ب رێکەفتنا لگەل گرووپا خیانەتکار یێن ناڤ یەنەکێ، ئێرشی کەرکووک و خورماتوو کرن و د ئەنجامێ دا ب سەدان وەلاتیێن کورد شەھید و بریندار بوون و نێزیکی 200 ھەزار کەس ژی ل ڤان دەڤەران کۆچبەر بوون.
ئاراس جەنگی برایێ سەرکردەیێ خایینێن یەنەکێ لاھور جەنگی ل خوە مکور ھات کو لگەل میلیشیا و ھێزێن ئیراقێ دا رێکەفتن کرنە. لاھور جەنگی چەندین جاران پەسنا ڤەکشینا ھێزێن یەنەکێ د رۆژا خیانەتا مەزن دا دایە.
د ھەمان دەمێ دا جیگرێ یەکەمێ سەکرەتەرێ یەنەکێ یێ وێ دەمێ کۆسرەت رەسوول د داخویانیەکێ دا خیانەتکار ب ترسۆنەک ب ناڤ کرن و گۆت، “بەرپرسیاریا کارەساتێن کەرکووک و خورماتوویێ بەرپرسیارێ ترسۆنەکێن ناڤ یەنەکێ یە.
د 18ێ جۆتمەھا 2017ێ دا، مەلا بەختیار، بەرپرسێ وێ دەمێ یێ دەستەیا کارگێری یا مەکتەبا سیاسی یا یەنەکێ د داخویانیەکێ دا راگھاندبوو یا ل کەرکووکێ ھاتیە کرن خیانەتە.
پارێزگارێ کەرکووکێ و ئەندامێ مەکتەبا سیاسی یا وێ دەمێ یا یەنەکێ نەجمەدین کەریم چەندین جاران تەکەز ل سەر وێ یەکێ کر کو خیانەتکار د ناڤ یەنەکێ دا خیانەت د خوینا وان دا یە و خیانەت ژ بۆ خوە کریە پیشە.
ژ 16ێ جۆتمەھا ئیسال ڤە، سەرۆکوەزیرێ وێ دەمێ حەیدەر عەبادی، نووری مالکی و سەرکردەیێن دن یێن ئیراقێ چەند جاران سپاسیا کۆما خیانەتکار د ناڤ یەنەکێ دا کرنە کو ب ھێسانی کەرکووک و پرانیا ناڤچەیێن کوردستانێ رادەستی وان کرنە.
ل گۆری دەستوورا ئیراقێ، رێڤەبەریا ئیداری، یاسایی، ئەولەکاری و لەشکەری یا کەرکووکێ و ناڤچەیێن کوردستانی یێن ل دەرڤەیی ئیدارەیا ھەرێما کوردستانێ دڤێت ب ھەڤبەشی د ناڤبەرا حکوومەتا ئیراقێ و حکوومەتا ھەرێما کوردستانێ دا بە، ل شوونا وێ، د بن دەستھلاتا لەشکەری یا یەکئالی یا حکوومەتا ئیراقێ دا یە. کەرکووک و ناڤچەیێن کوردستانی، تاوانێن خرابکرن و کۆچبەرکرنێ بەردەوامە و ھەول تێ دایین زمان و ناسنامەیا کوردی ل کەرکووک و ھەرێمێن کوردستانی ل ھۆلێ بێ راکرن.
