چیایێن ناڤچەیا شەرا یا عەفرینێ ژ ئالیێ فرۆکەیان ڤە ھاتن بۆمبەبارانکرن. رەوانگەھا سووری یا مافێن مرۆڤان دبێژە، بارەگەھێن گرووپا فەیلەقا سێیەم یا ئۆپۆزیسیۆنا سووریێ ژ ئالیێ فرۆکەیێن رووسی ڤە ھاتنە بۆمبەبارانکرن.
ل گۆر زانیاریان، فرۆکەیان چیایێن گوندێن مەتینا، قتمە، دێر سوان و کەفر جەنێ یێن ل ناڤچەیا شەرا یا عەفرینێ ب 5 مووشەکان بۆمبەباران کرن.
ژ ئالیێ خوە ڤە رەوانگەھا سووری یا مافێن مرۆڤان بەلاڤ کر، فرۆکەیێن شەر یێن رووسی بارەگەھێن گرووپا جەبھە ئەل-شامیێ و سقۆر ئەل-شەمال یێن د ناڤبەرا گوندێن قتمە و بافلوونێ یێن ناڤچەیا شەرا بۆمبەباران کرن.
ل گۆری زانیاریێن رەوانگەھێ، د ئەنجامێ دا 2 چەکدار ھاتن کوشتن و 9 چەکدار ژی بریندار بوون. ھەر وھا ھین ژی فرۆکەیێن رووسیایێ ل ئاسمانێ ھەرێما عەفرینێ دگەرن.
ئەڤ یەک د دەمەکێ دا یە، گرووپا ھەیئەت تەحریر ئەل-شام (نوسرە) ژ رۆژا 11ێ ڤێ مەھێ ڤە دەرباسی ھەرێما عەفرینێ بوویە، 13ێ ڤێ مەھێ ڤە باژارێ عەفرینێ ژ چەکدارێن فەیلەقا سێیەم کۆنترۆل کر و گھیشتیە نێزیکی گوندێ کەفەر جەنێ.
ل گۆر زانیاریان ژی، شاندەکا ھەیئەتا تەحریر ئەل-شام گھشتە باژارێ ئەزازێ و لگەل سەرکردایەتیا فەیلەقا سێیەم ل نێزیکی دەریێ سینۆری یێ لگەل ترکیێ دا (باب ئەل-سەلامە) جڤیا، بێیی کو ئاگاھی ل سەر ئەنجامێن وێ جڤینێ ھەتا نھا بێن زانین.
