“د ھەفتەیەکێ دا 58 کەس ل عەفرین و بابێ ھاتنە کوشتن”

"د ھەفتەیەکێ دا 58 کەس ل عەفرین و بابێ ھاتنە کوشتن"

ھەژمارا کوشتیێن شەر و پەڤچوونێن د ناڤبەرا ھەیئەت تەحریر ئەل-شام و گرووپا فەیلەقا سێیەم یا سەر ب ئارتێشا نشتمانی یا ئۆپۆزیسیۆنا سووریێ ڤە ل عەفرین و گوندەوارێ حەلەبێ گھشتە 58 کەسان، د ناڤا وان 10 سڤیل ھەنە.

پشتی شەرێ ھەفتەیەکێ ل گوندەوارێ حەلەبێ و ھەرێما عەفرینێ د ناڤبەرا ھەیئەت تەحریر ئەل-شامێ و فەیلەقا سێیەم دا، ئیرۆ ھەتا نھا ئارامیەک ل عەفرینێ و گوندەوارێ وێ ھەیە، پشتی کو ھەیئەت تەحریر ئەل-شام دوھی دوشەمێ گوندێ کەفەر جەنێ یا ستراتەژیک و ھەژمارەک گوندێن دن ل ناڤچەیا شەرا یا عەفرینێ کۆنترۆل کرن.

ل گۆری زانیاریێن رەوانگەھا سووری یا مافێن مرۆڤان، د ھەفتەیەکێ دا 10 کەسێن سڤیل و 48 چەکدارێ ژ گرووپێن جودا د شەر و پەڤچوونان دا ھاتنە کوشتن:

– 28 چەکدارێن ھەیئەت تەحریر ئەل-شام و گرووپێن پشتەڤانێ وێ دکن (سلێمان شاھ و ھەمزات) د شەر و پەڤچوونێن ل ھەرێما عەفرینێ و و باکورێ رۆژئاڤایێ حەلەبێ ھاتن کوشتن.

– 16 چەکدار ژ فەیلەقا سێیەم (جەبھەت ئەل-شامی و جەیش ئەل-ئیسلام) ل عەفرین و باکورێ رۆژئاڤایێ حەلەبێ ھاتن کوشتن.

– 4 چەکدارێن دن ژ گرووپێن دن ل ھەرێما عەفرینێ و بابێ ھاتن کوشتن.

– 10 سڤیل ھاتن کوشتن، ژ وان 3 کەس ل ھەرێما بابێ نە و 7 ژی ل ھەرێما عەفرینێ نە کو د ناڤا وان 3 ژن و 3 زارۆک ھەنە.

ژ بەر گرانیا برینێن ھن برینداران، ئەگەر ھەیە ھەژمارا کوشتیان زێدە ببە.

ژ ئالیێ خوە ڤە، جیگرێ سەرۆکێ ناڤەندا لھەڤھاتنا نشتمانی یا رووسیایێ ل سووریێ جەنەرال «ئۆلەگ یەگۆرۆڤ» رۆژا 16ێ جۆتمەھا 2022ێ دیار کر، ھێزێن وان یێن ئاسمانی ئێریشی کامپەکا پەروەردەکرنا چەکداران د ناڤبەرا عەفرین و عەزازێ کر و د ئەنجامێ دا نێزی 100 چەکداران ھاتن کوشتن.

پوستێن ھەمان بەش