کەچەکە سلێمانیێ کو تەمەنێ وێ د بن 16 سالیێ دا بوویە، د ناڤا رەفێن پەکەکێ دا ھاتیە کوشتن.
لگۆر مەدیایا پەکەکێ کەچا ب ناڤێ “پەیام عەبدوللاھ” کو دایک و بابێن وێ خەلکێ سلێمانیێ نە و ل سلێمانیێ ژ دایک بوویە و د سالا 2017ێ دا تەڤلی پەکەکێ بوویە، دەما کو د تەمەنێ زارۆکاتیێ دا بوویە.
ل گۆر زانیاران ئەو کەچ د ناڤ پەکەکێ دا ب ناڤێ “دەلال شۆرەش” دهێت ناسکرن و برایێ وێ ژی د ناڤ پەکەکێ دایە.
ل گۆری پەکەکێ ئەو جوان د جۆتمەھا 2022یێ دا ل ھەرێما زاپێ یا باشوورێ کوردستانێ ھاتیە کوشتن.
رێڤەبەرێ گشتی یێ کۆمیسیۆنا مافێ مرۆڤان “سلێمان مۆحسن سندی” راگەھاند: “مخابن گەلەک تێبینی ل سەر کریارێن پەکەکێ ھەنە، ژ بەر کو ب دەھان حالەت ھەنە کو پەکەکە زارۆکان ژ بۆ کارێن خوە یێن لەشکەری بکارتینە، مخابن ئەڤ دۆسیا نە. د ناڤا پەکەکێ دا زێدە دبە، ب تایبەتی ژی خاپاندنا کەچان و برنا وان بۆ قەندیلێ، ئەنجام ژی ئەڤە.”
