پارتیا دەمۆکراتیکا گەلان (ھەدەپە)، پارتیا کۆمارییا گەل (جەهەپە) و پارتیا پێشەرۆژێ (گەلەجەک) بەرتەک ل دژی گۆتنێن ئەردۆگان نیشان دان، کو گۆتبوو “محەمەد عەلی چەلەبی” و ھەڤژینا وی: “زێدەبوونا زارۆکان گەلەک گرینگە. ل پەکەکێ بنێرە، 5، 10، 15 زارۆکێن وان ھەنە.”
جیگرا سەرۆکێ فراکسیۆنا پارتیا دەمۆکراتیکا گەلان (ھەدەپێ) مەرال دانش بەشتاش بەرتەک ل گۆتنێن سەرۆکۆمارێ ترکیێ و سەرۆکێ گشتی یێ پارتیا داد و گەشەپێدانێ (ئاک پارتی) رەجەپ تەییب ئەردۆگان نیشان دا، کو ئەردۆگان گۆتبوو: “زێدەبوونا زارۆکان گەلەک گرینگە. ل پەکەکێ بنێرە، 5، 10، 15 زارۆکێن وان ھەنە.”
مەرال دانش بەشتاش ل پارلامەنتۆیا ترکیێ دیار کر: “ئەو زێدەبوونا زارۆکان وەکە کارەکی تەرۆرێ دبینە. ئەڤ مەژیەکی نژادپەرەستییە.”
سەرۆکێ گشتی یێ پارتیا پێشەرۆژێ (گەلەجەک) ئەحمەد داودئۆغلو ل سەر حەسابا خوەیا تویتەرێ بەرتەک ل دژی گۆتنێن ئەردۆگان نیشان دا.
ئەحمەد داودئۆغلو دیار کر: “وەکە دهێت زانین، زارۆکێن ڤی وەلاتی ل قەندیلێ ژداییک نابن، مەبەستا وە گەلەک ئەشکەرە ل ھۆلێ یە برێز ئەردۆگان! گۆتنێن وە ل ھەمبەر مافێن مرۆڤان و مافێن ژنان بێرێزییە. ھەموو زارۆکێن کو ل ڤی وەلاتی ژداییک دبن، وەلاتیێن بروومەتێن کۆمارا ترکیێ نە. جوداخستنا ناڤبەرا زارۆکان نژادپەرەستییە.”
جیگرێ سەرۆکێ فراکسیۆنا پارتیا کۆمارییا گەل (جەهەپێ) ئۆزگور ئۆزەل ژی ل پارلامەنتۆیا ترکیێ دیار کر: “ئەگەر د تۆمارێن وەزارەتا ناڤخوە دا زارۆکێن پەکەکێ تونە بن، ژ کێ رە دبێژە پەکەکە، ژ کێ رە دبێژە تەرۆریست؟ ئەم ڤێ گۆتنێ شەرمەزار دکن.”
