دیسا پەکەکە، دیسا دەرەو، دیسا بێئەخلاقی
پارتیا کارکەرێن کوردستانێ کو هەم ل قادا شەر و هەم ل قادا سیاسی دە راستی شکەستنێن هەری مەزن هاتیە، دخوازە جارەکە دن ب ڤەهاندنا دەرەوان و کرێتکرنا روویێ حکوومەتا هەرێما کوردستانێ و پەدەکێ روویێ خوە یێ رەش سپی بکە، لێ روویێ پەکەکێ ئەوقاس رەشە کو نە ب تەنێ ب ڤەهاندنا دەرەوان، بەلکو ب ت تشتەکی دن سپی نابە، روویێ پەکەکێ رەش بوویە، رەش دبە و وێ هەر رەش بمینە، ژ بەر کو رێخستنەکە ل سەر دەرەو و سەختەکاری و بێبەختی و دژایەتیکرنا کوردان ب دەستێ دەولەتێن داگیرکەرێن کوردستانێ هاتیە ئاڤاکرن.
ژ دەستپێکا شەرێ سەختەیێ د نێڤبەرا دەولەتا داگیرکەرا ترکیێ و رێخستنا پەکەکێ ل باشوورێ کوردستانێ هەیا نها، کو د ڤی شەرێ سەختە دا پەکەکێ هەژمارەکا هەری زۆر یا جوانێن کورد ب کوشتن دانە و رووبەرەکی هەری مەزن ژ خاکا ولات ل باشوور تەسلیمی دەولەتا ترک کریە و هەیا رۆژا مە یا ئیرۆ خوە ژ تێ بێئەخلاقیەکی دەرحەق حکوومەتا باشوورێ کوردستانێ و پەدەکێ ب دوور نەگرتیە. هەر کو دچە ترکیە پێتر ئاخا باشوور داگیر دکە و پەکەکە ژی پێتر پاشڤە دچە و پێتر ل دژی حکوومەتا هەرێما کوردستانێ دەرەوان پارڤە دکە.
پەکەکە نها د مەدیایا خوە دە ب ئاوایەکی سیتەماتیک نووچە و ئاگاهیێن دەرەو دەرحەق پەدەکێ و حکوومەتا هەرما کوردستانێ دە پارڤە دکە، مرۆڤ دکارە ببێژە رۆژ ناچە پەکەکە د مەدیایا خوە دە ل دژی هەرێما کوردستانێ نووچەیان پارڤە نەکە، ب ئاوایەکی کو هەر کەس ل چاپەمەنیا پەکەکێ بنێرە دێ ووسا فێم بکە ئەڤ پەدەکەیە ئێریش دکە نە دەولەتا ترک، پەکەکە ب قاسی کو د چاپەمەنیا خوە دە ئێریشی پەدەکێ دکە ئەوقاس ئێریشی ترکیێ ناکە.
پەکەکێ ژ بۆی ڤەشارتنا شکەستنا خوە ڤێ جارێ پەنا ژ بۆی دەرەوێن نوو بریە، دبێژە ب چەکێ کیمیەوی ئێریشی مە تێ کرن و پەدەکە ژی رێ نادە شاندەیێن بیانی ڤێ یەکێ لەکۆلین بکن، مەبەستا مە ژ ڤێ نڤیسێ ئەڤ نیە کو ببێژین دەولەتا ترک هۆڤ و بێئەخلاق نیە و نکارە و ناخوازە چەکێ کیمیەوی بکار بینە، مەبەستا مە ب تەنێ ئەڤە کو ژ خوەندەڤانێن خوە یێن ب روومەت رە ئەشکەرە بکین پەکەکە ب خوە، خوە دەرەوین دەردخینە، چەوا؟ ئەمێ ژ وە رە ببێژن.
د نووترین دەرەوا خوە دە پەکەکێ ب رێیا یەک ژ فەساد و بێبەختێن رۆژ نیوسێ نووچەیەک سەرڤیس کریە و تێدە دبێژە، “ژ دەستپێکرنا ئێرشێن دەولەتا ترکا داگیرکەر ل باشوورێ کوردستانێ و ڤر ڤە د ناڤا 6 مەھان دە ل قادێن بەرخوەدانێ 2476 جاران ب چەکێن کیمیەوی و بۆمبەیێن قەدەغەکری ئێرش ل سەر گەریلایێن ئازادیێ پێکھاتنە و تاوانێن شەر پێک ھاتنە.” ئەم ناخوازن هۆڤیتی و روویێ رەشێ دەولەتا داگیرکەرا ترک سپی بکن، دەولەتا ترک دکارە ئێریشێن پێتر و هۆڤانە تر بکە، دکارە هەر جورە چەکەکی ل دژی کوردان بکاربینە، لێ بەلێ گەر مرۆڤ بخوازە فێم بکە ئەڤ نووچەیا پەکەکێ دەرەوە یان ژی راستیەکە، پیویستی ب چ لێکۆلینەکی ناکە ب تەنێ ئەڤ بەسە کو ژ خوە و پەکەکێ بپرسە، گەلۆ گەر دەولەتا داگیرکەرا ترک 2476 جاران چەکێ کیمیەوی بکارئانیبە هەیا نها چەند گەریلا بوونە قوربانی؟ ب تەنێ 46؟! ب راستی ژی کەسێ کو مەژیکێ وی هەبە وێ فێم بکە گەر 2476 جاران ئێریشێن کیمیەوی ل دژی پەکەکێ پێک هاتبن، دڤیابوو نها هەری کێم 1000 گەریلا هاتبوون کوشتن، گەلۆ گەر ئەڤ قاس گەریلا هاتنە کەشتن چما پەکەکە ناڤێن وان ژ بۆی گەلێ کورد و مالباتێن وان ئەشکەرە ناکە؟ چما بەردەوام دبێژە ئەم بسەرکەتنە؟
ژ ئالیەکی دن ڤە، پەکەکێ ڤیدەئۆیەکە مۆنتاژکری د نووچەیا خوە دە دانیە و دبێژە، “پەدەکێ ژ بەری نھا دەست دانیبوو ل سەر ماسکەیێ ژ بۆ گەریلا دچوون و پشترە ژی رێ نەدا شاندەیێن بیانی بچن قادێ بکارئانینا چەکێن کیمیاوی لێکۆلین بکە”، پەکەکێ ئەڤ دیمەن ژ ڤیدوئۆیەکە 4:17 یا کو دژە تەرۆرا کوردستانێ ل 26 نیسانا ئیسال پارڤە کریە وەرگرتیە کو تێدە دژە تەرۆرا کوردستانێ راگهاندبوو، وان کاریە ل 17ێ نیسانێ پلانەکە خەتەرا پەکەکێ ل سەر هەرێما کوردستانێ پووچ بکە، دژە تەرۆرێ د ڤێ ڤیدەئۆیێ دە ئەشکەرە کربوو کو دەست دانیە سەر هەژمارەک هەری زێدە یا تەقەمەنی، مووشەک، مەکینەیێن درۆنان، ماسکێن دژە گازێن کیمیەوی و هەژمارەک ساجوورێن کەلاشینکۆفێ.
دژە تەرۆرا کوردستانێ ل وێ دەمێ نە ب تەنێ دەست دانیبوو سەر ماسکەیان، بەلکو دەست دانیبوو سەر 1 تۆن مادەیێن تەقەمەنی ژ جوورەیێ پی ئی تی ئێن، 10 مۆشەکێن کۆنکۆرس یێن دژە تانک، 23 مەکینەیێن درۆنێن ئێریشبەر، 1200 ماسکەیان و 375 ساجوورێن کەلاشینکۆفی”، لێ ل وێ دەمێ پەکەکێ ت داخویانیەک پارڤە نەکر کو ببێژە ئەڤ تشت یێن مە نە، بەرەڤاژی تەڤ کادرۆیێن خوە یێن د چاپەمەنیێ دە کار دکن سەفەر بەر کرن کو ووسا نیشانی گەل بدن ئەڤ دەرەوەکە و پەدەکە دخوازە ب ڤێ یەکێ روویێ پەکەکێ رەش بکە، ئالیگرێن پەکەکێ ژی د سۆسیال مەدیایێ دە ئێریشی پەدەکێ وحکوومەتا هەرێما کوردستانێ کرن و راگهاندن، ئەڤ دەرەوە، لێ نها پەکەکە دبێژە یێن مە بوون، ب تەنێ دا کو گەل بخاپینە و خوە وەکە مەزلۆم و پەدەکێ وەکە زالم نیشان بدە.
یا راست پەکەکێ دخوەست ب ڤان چەک و تەقەمەنیان ئێریشی پێشمەرگەیێن کوردستانێ بکە، پەکەکێ دخوەست ئێریشی سەدا دهۆکێ بکە و هن کارێن سۆئیقەستێ د ناڤا باژاران دە پێک بینە، لێ دژە تەرۆرا کوردستانێ رێ ل بەر وان گرت، د 26 گۆلانێ دە ژی دژە تەرۆرا کوردستانێ گرۆپەکە سیخۆری یا پەکەکێ دەستەسەر کر کو دخوەست ب مۆشەکان ئێریشی سەر هێزێن پێشمەرگەیێن کوردستانێ بکن.
د بەشەکە دن یا نووچەیا خوە یا سەختە دە پەکەکە دبێژە، “شاندەیەکی ژ پزیشکێن ناڤنەتەوی (IPPNW) دخوەست بچە ھەرێمێن چەکێن کیمیاوی لێھاتنە بکارئانین لێکۆلین بکن، شاندەیێ سەردانا ئامێدیێ کر و ھەول دا کو خوە بگھینە گوندێ ھرور و کانی ماسیێ، لێ قایمەقامێ ئامێدیێ دەستوور نەدا بچە ل وان قادان بکارئانینا چەکێن کیمیاوی لێکۆلین بکن و راپۆرێ ل سەر ئامادە بکە.” تەڤی کو پێویست نەدکر پێوەندیێ ب قایمقامێ ئامێدیێ بکین هەیا کو راستیا مژارێ فێم بکین، ژ بەرکو راستی دیارە، لێ خەباتکارێن “دارکا مازی” ژ بۆی دەرخستنا راستیا ڤێ مژارێ پێوەندی ب قایمەقامێ ئامێدیێ برێز “وارشین بەرواری” کر، بەرواری راگهاند هیچ شاندەیەک دەرباسی ئامێدیێ نەبوویە و مە رێگری ل چ شاندەیەکێ نەکریە و ئەم رێگریێ ژی ناکن.
ژ خوە ژ بۆی کو فێم بکین پەکەکە دەرەوان دکە و هیچ شاندەیەک دەرباسی باشوور نەبوویە ب تەنێ ئەڤ گۆتنا پەکەکێ بەسە دەما تێدە دبێژە، “یەکیتیا پزیشکێن ناڤنەتەوەیی (IPPNW) دەربارێ بکارانینا چەکێن کیمیاوی یا ژ ئالیێ دەولەتا ترک ڤە راپۆرەک ئامادەکر. د راپۆرێ دە ھاتە گۆتن؛ “دەلیل ھاتن بدەستخستن، بلا لێپرسین وەرە دەستپێکرن.” گەلۆ گەر قایمەقامێ ئامێدیێ و پەدەکێ رێگری ل ڤێ شاندەیێ کربە و رێ نەدابە دەرباسی “هەرێمێن پاراستنا مەدیا” ببە، ڤێ شاندەیێ چەوا دەربارێ بکارئانینا چەکێن کیمیاوی یا ژ ئالیێ دەولەتا ترک ڤە راپۆرەک ئامادەکر و دەلیل ب دەست خستنە؟
دەرەو و بێئەخلاقیا پەکەکێ ل ڤر ب داوی نابە، د بەشەکە دنا دەرەوا خوە دە پەکەکە دبێژە، “ل گۆری گۆتنا کەسێن ل گوندێ ھرۆرێ ژ بکارئانینا چەکێن کیمیاوی باندۆر بوونە، ب فەرمانا پەدەکێ ل نەخوەشخانەیان راپۆرێن بژیشکان قالا بکارئانینا چەکێن کیمیاوی ناکە و وەکە نەخوەشیەک دن ددن دیارکرن.” ئەڤ ژی دەرەوەک ئەشکەرە یە ژ بەر کو گەر رەوش ووسا بە وەکە پەکەکە قال دکە، دڤیابوو تەڤ کەسێن ل گوندێ هرۆرێ ب باندۆر ببانە و تەڤ کەسێن گوند چووبانە نەخوەشخانەیان.
ب کورتاسی، پەکەکە و دەرە وەکە سێڤەکینە کو ژ نیڤێ هاتبە شەقکرن، پەکەکە ریخستنەکە کو ب تەنێ د چاپەمەنیێ دە و ب دەرەوان زندی مایە.
ڤیدەئۆیا دژە تەرۆرا کوردستانێ ب تەمامی:
