پارێزگەریا دیاربەکرێ راگھاند کو ھەموو جوورە چالاکی ژ بۆ رۆژەکێ ھاتنە قەدەغەکرن و د ڤێ چارچۆڤەیێ دا ژی چالاکیا ھەدەپێ یا ل پارکا «کۆشویۆلو» دا هێتە کرن، ھات قەدەغەکرن و رێ ل بەر داخویانیێ ھات گرتن.
پارتیا دەمۆکراتیکا گەلان (ھەدەپێ) و سازی و رێخستنێن ھەڤگرتیێن وێ ب ئیدیعایا کو ئارتێشا ترکیێ د ئۆپەراسیۆنا ھەمبەری پەکەکێ دا چەکێن کیمیاوی ب کار ئانیە، خوەست چالاکیەکێ ل دار بخە.
بەریا چالاکیێ ژی پارێزگاریا دیاربەکر ب نڤیسەکا فەرمی راگھاند کو ھەموو جوورە چالاکیێن 20ێ جۆتمەھێ ھاتنە قەدەغەکرن.
ل سەر ڤێ یەکێ ژی گرسەیا کو بۆ چالاکیێ ل پارکا کۆشویۆلو جڤیابوو ژ ئالیێ ھێزێن ئەولەکاریێ ڤە ھات دۆرپێچکرن و ژ بۆ داخویانیێ رێ نەھات دایین. پشترا پۆلیسان ھشیاریا بنچاڤکرنێ دا و گرسەیا کو پارلامەنتەرا دیاربەکر یا ھەدەپێ «رەمزیە تۆسون» ژی تێ دە بوو، کۆم ب کۆم بەلاڤ بوو.
وەزارەتا بەرەڤانیا ترکیێ ئیددیعایا بکارئانینا چەکێن کیمیاوی رەد کربوو کو وان د ئۆپەراسیۆنا ل دژی پەکەکێ دا چەکێن کیمیەوی بکارئانیبن و راگهاندبوو د دەستێن وان دا چەکێن کیمیاوی تونەنە.
